Нацбанк — за ўвядзенне крымінальнай адказнасці за стварэнне фінансавых пірамідаў

Нацыянальны банк Беларусі падтрымлівае ідэю ўвядзення крымінальнай адказнасці за стварэнне фінансавых пірамідаў, заявіў намеснік старшыні праўлення банка Сяргей Дубкоў на прэс-канферэнцыі ў Мінску 6 лютага.

Пры гэтым ён зазначыў, што любое развіццё фінансавага рынку можа мець вынікам з’яўленне структур, якія паводзяць сябе несумленна, «гэта хвароба росту».

«Піраміда — гэта насмарк, яго трэба лячыць усімі магчымымі спосабамі.

«Неабходнае ўнясенне зменаў у заканадаўства, у першую чаргу ў Крымінальны кодэкс, з яснай ідэнтыфікацыяй паняцця „піраміда“ і зменаў па адпаведных артыкулах пакаранняў.

Ён звярнуў увагу на тое, што, напрыклад, у Казахстане ў гэтым пытанні «ўжо выйшлі на фінішную прамую прыняцця закона, які ясна рэгламентуе, што такое фінансавая піраміда і якое пакаранне яна цягне». «Прычым у многіх краінах, у тым ліку еўрапейскіх, гэта дакладна замацаваныя нормы», — дадаў Дубкоў.

На заканчэнне ён нагадаў, што па пытанні, звязаным з дзейнасцю «МММ» у Беларусі, справа перададзена ў суд. Намеснік кіраўніка Нацбанка выказаў надзею, што абвінавачаныя «будуць пакараныя адпаведным чынам».

***

Нагадаем, супрацоўнікі мінскага офіса «МММ-2011» былі затрыманыя спецслужбамі 16 сакавіка 2012 года. У дачыненні да іх КДБ распачаў справу на падставе ч. 3 арт. 233 КК. Расследаванне было перададзена ў Следчы камітэт.

На сустрэчы з журналістамі 27 красавіка старшыня СК Валерый Вакульчык паведаміў, што ўрон ад дзейнасці «МММ-2011» у Беларусі ацэньваецца ў 800 млн. рублёў.

Паводле інфармацыі КДБ, каардынатар фінансавай піраміды і іншыя асобы, дзейнічаючы ад імя не зарэгістраванай у падатковых органах і органах мясцовай выканаўчай улады арганізацыі «МММ-2011», ажыццяўлялі на тэрыторыі Беларусі дзейнасць па прыёме ўкладаў і ставак на выйгрыш ад насельніцтва. Выплата працэнтаў па ўкладах або вяртанне ўкладзеных грашовых сродкаў з улікам агаворанага ўзнагароджання (выйгрышу) ажыццяўлялася членамі групы за кошт прыцягнення новых укладаў (ставак) грамадзян, якія наўмысна ўводзяцца ў зман адносна законнасці і эканамічнай мэтазгоднасці ўчынення такіх аперацый.

У выніку незаконнай дзейнасці «МММ-2011» у фінансавыя махінацыі аказаліся ўцягнутымі некалькі тысяч грамадзян Беларусі. Асноўны кантынгент удзельнікаў фінансавай піраміды склалі маладыя людзі 1985–1990 гадоў нараджэння, незнаёмыя з дзейнасцю «МММ» пачатку 1990-х гадоў і яе негатыўнымі наступствамі для мільёнаў грамадзян.

• 0
• 0
• 0
• 0
• 0
• 0
• 0
• 0