Ірыне Халіп дазволілі з'ездзіць да мужа. Ірына: Гэта чарговы этап гандлю з Еўропай
Пра гэта Ірыне Халіп сказалі 13 лютага ў крымінальна-выканаўчай інспекцыі Партызанскага РУУС, дзе яна стаіць на ўліку. Ірыне Халіп дазволілі выезд да 3 красавіка.Жонцы былога кандыдата ў прэзідэнты Андрэя Саннікава Ірыне Халіп дазволілі часовы выезд з Беларусі, каб наведаць мужа ў Лондане і рэдакцыю расійскай «Новой газеты».
Па словах журналісткі, дазвол на выезд рыхтаваўся ў спешцы. Сп. Ірына расказала карэспандэнту «НН», што яшчэ ў панядзелак, калі яна адзначалася ў міліцыі, ёй нічога не паведамілі.Але «калі я даведалася, што прадстаўніка Аператыўна-аналітычнага цэнтра такі запрасілі на форум у Вену, стала зразумела, што і маю просьбу на выезд задаволяць», — патлумачыла журналістка. Па яе назіраннях, рашэнне прымалася ў спешцы. «Учора пад канец працоўнага дня патэлефанавалі і сказалі, што трэба хутка-хутка рыхтаваць паперы».
Акрамя таго, у рэдакцыю «Новай газеты» прыйшла тэлефанаграма з беларускай амбасады ў Маскве. У ёй паведамляецца, што просьба дазволіць Ірыне Халіп прысутнічаць на рэдакцыйных мерапрыемствах задаволеная. «Гэта пры тым, што рэдактар Дзмітрый Муратаў звяртаўся з такой просьбай да Лукашэнкі яшчэ ў кастрычніку мінулага года. Але тады тую просьбу проста праігнаравалі», — кажа журналістка.
Па яе словах, дазвол на спатканне з мужам і магчымасць наведаць рэдакцыю ў Маскве азначае, што беларускія ўлады пачалі чарговы этап гандлю з Еўропай.
Нагадаем, што 28 студзеня Ірына Халіп падчас наведвання крымінальна-выканаўчай інспекцыі Партызанскага РУУС Мінска, дзе яна кожны тыдзень павінна адзначацца, перадала заяву з просьбай дазволіць ёй выезд за межы Беларусі.
На заяву журналісткі, паводле закону, улады павінны даць адказ на працягу 30 сутак.
***
Ірына Халіп у маі 2011 года была прызнана вінаватай ва ўдзеле ў масавых беспарадках пасля выбараў 19 снежня 2010 і асуджана на два гады пазбаўлення волі з адтэрміноўкай выканання пакарання на два гады. Яна не мае права пакідаць Мінск, абавязана кожны тыдзень адзначацца ў міліцыі і быць дома пасля 22.00. Адтэрміноўка заканчваецца 17 ліпеня гэтага года, пасля чаго справа Халіп будзе ў другі раз разгледжана ў судзе, які вырашыць, вызваліць яе, накіраваць у калонію або пакінуць у тым жа статусе яшчэ на нейкі тэрмін.
Цяпер чытаюць
Толькі жмінда і лянівы не падтрымлівае «Нівы»! Вы можаце за хвіліну падтрымаць «НН» падаходным, не патраціўшы ні капейкі сваіх3
Каментары