Аляксандр Лукашэнка заяўляе, што змяненне выбарчага заканадаўства ў краіне павінна быць узважаным і ў інтарэсах беларускага народа, а не дзеля спаборніцтва з іншымі краінамі.
Адкрываючы нараду, Лукашэнка адзначыў: «Як і дамаўляліся ў студзені, мы яшчэ раз сустракаемся і абмяркоўваем пытанні ўдасканалення выбарчага заканадаўства. Я мяркую, сённяшняя размова будзе канчатковай перад унясеннем праекта закона ў парламент».
Па словах Лукашэнкі, у гэтым праекце знайшлі адлюстраванне ўхваленыя прапановы па аптымізацыі выбарчага працэсу.
«Паколькі праектам закона закранаюцца вельмі важныя для выбарчай сістэмы пытанні, рашэнне аб неабходнасці яго ўнясення ў палату прадстаўнікоў у прапанаванай рэдакцыі павінна быць максімальна прадуманым», — мяркуе ён.
Пры гэтым Лукашэнка падкрэсліў, што неабходна ўлічыць усе магчымыя наступствы прапанаваных мер і выразна ўяўляць сабе механізм іх рэалізацыі.
«Калі мы ідзем на нейкае паслабленне, то павінны быць упэўнены, што гэта не адаб’ецца негатыўна на стабільнасці ў краіне і кіравальнасці сітуацыяй падчас выбараў», — падкрэсліў Аляксандр Лукашэнка. Пры гэтым ён адзначыў, што «ніякага самавольства і бескантрольнасці быць не павінна».
«Ведаю, што шэраг палажэнняў праекта падтрыманы не ўсімі.Пярэчанні выклікаюць нормы аб змяненні парадку фінансавання выбарчых кампаній кандыдатаў. У прыватнасці, аб павелічэнні памераў выбарчых фондаў і магчымасці іх стварэння на этапе вылучэння кандыдатаў у Прэзідэнты Рэспублікі Беларусь яшчэ да рэгістрацыі кандыдатаў «.
У сувязі з гэтым Аляксандр Лукашэнка прапанаваў калегіяльна абмеркаваць законапраект у цэлым і яго асобныя палажэнні, якія выклікалі рознагалоссі сярод удзельнікаў нарады. «Каб прыняць узважаныя рашэнні, у поўнай меры якія адказваюць інтарэсам беларускай дзяржавы, мы сёння і сабраліся», — сказаў кіраўнік дзяржавы.
Пры гэтым Лукашэнка папрасіў: «Давайце не будзем ладзіць нейкія скокі, каб бегчы з кімсьці навыперадкі,давайце не будзем прыспешваць час і пастараемся ісці ў нагу з падзеямі і асабліва сталасцю нашага грамадства. І давайце будзем вырашаць тыя пытанні, якія сёння наспелі, не выдумляючы нейкіх новых, спасылаючыся на новыя дэмакратычныя ці старыя дэмакратычныя дзяржавы і працэдуры «.
Аляксандр Лукашэнка падкрэсліў: «Мы жывем у сваёй краіне, ёсць праблема, ёсць пытанне — давайце вырашаць. Няма праблемы, няма пытання — давайце не будзем ствараць гэтыя праблемы і пытанні».
Аляксандр Лукашэнка адзначыў, што крытэр адзін: «Выбары, іншыя кампаніі праходзяць у Беларусі для беларускага народа і ў імя гэтага народа.І вырашаць гэтыя праблемы, якія мы сёння будзем абмяркоўваць, павінен беларускі народ. Мы павінны ўсё рабіць так, як сёння жадае народ, які жыве ў нашай краіне. Гэта галоўнае «.
Каментары