Тысячы ўкраінцаў пранеслі цела беларуса Жызнеўскага ад сабора да Майдану ФОТЫ
Развітанне з Міхалам Жызнеўскім адбылося ў дзень яго нараджэння, 26 студзеня. Сёння яму споўнілася б 26 гадоў.
Майдан сёння быў у жалобе. Не было ні песень, на танцаў, ні традыцыйнага нядзельнага мітынгу.
Адпявалі Жызнеўскага святары Украінскай праваслаўнай царквы Кіеўскага патрыярхата. На развітанне прыйшлі лідары ўкраінскай апазіцыі, сярод якіх Віталь Клічко і Арсень Яцанюк.
З Беларусі на пахаванне прыехаў паэт Уладзімір Някляеў.
Неслі труну сябры забітага, у камуфляжы і масках.
Тысячы людзей ішлі за труной, якую на руках пранеслі ад Міхайлаўскага Залатаверхага сабора праз Майдан, Хрышчацікам. Яго пранеслі паўз барыкады, на якіх ён загінуў. І на хвіліну Майдан замёр у маўчанні.
Украінская дарога беларуса скончылася. Пахаваюць яго на радзіме, у Гомелі.
Міхал Жызнеўскі загінуў 22 студзеня ў Кіеве ў часе спробы спецназаўцаў, верных Віктару Януковічу, ачысціць вуліцу Грушэўскага. Куля, выпушчаная са зброі 12-міліметровага калібра, прайшла ягонае цела наскрозь.
Паводле вынікаў незалежнага расследавання, забітыя на вуліцы Грушэўскага, у тым ліку Жызнеўскі, загінулі ад пападання кулі, выпушчанай з гладкаствольнага ружжа. Прычым агонь вёўся з блізкай адлегласці. Выказваліся меркаванні, што асобныя экстрэмісты з ліку байцоў спецпадраздзяленняў зараджалі такія латунныя паляўнічыя кулі ў ружжы, якія выкарыстоўваюцца для стральбы гумовымі кулямі. Тэхнічна гэта магчыма.
Цяпер чытаюць
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары