Саюз юрыдычных асоб «Рэспубліканская канфедэрацыя прадпрымальніцтва» (РКП) просіць урад тэрмінова склікаць пасяджэнне грамадска-кансультацыйнага і экспертнага савета пры Міністэрстве прамысловасці, каб разам з бізнес-саюзамі абмеркаваць праект указа прэзідэнта, які прадугледжвае ўвядзенне ў Беларусі інстытута спецімпарцёра.
Лісты з такой просьбай 20 чэрвеня былі накіраваны ў адрас прэм'ер-міністра Міхаіла Мясніковіча, віцэ-прэм'ера Уладзіміра Сямашкі і міністра прамысловасці Дзмітрыя Кацярыніча, паведаміў на брыфінгу ў Мінску старшыня прэзідыума РКП Уладзімір Карагін.
Нагадаем, 18 чэрвеня стала вядома, што ў Беларусі падрыхтаваны праект указа прэзідэнта «Аб забеспячэнні Рэспублікі Беларусь некаторымі імпартнымі таварамі», які прадугледжвае ўвядзенне інстытута спецімпарцёра многіх тавараў.
Ва ўрадзе такую меру тлумачаць неабходнасцю абароны інтарэсаў дзяржавы. Згодна з праектам указа з 1 ліпеня 2014 года да 1 студзеня 2015 года дзяржаве перадаецца выключнае права на ажыццяўленне імпарту шэрагу тавараў: радыё-, тэле-, відэа- і бытавой тэхнікі, падшыпнікаў, рухавікоў, сельгастэхнікі, грузавых аўтамабіляў, станкоў, уборачнай тэхнікі, ліфтаў, шын і іншых.
Мяркуецца, што ў названы перыяд выключнае права на імпарт такіх тавараў будуць мець 12 дзяржпрадпрыемстваў, а менавіта: Мінскі падшыпнікавы завод, «Гомсельмаш», МЗОР, «Белшына», Мінскі маторны завод, «Магілёўліфтмаш», «Інтэграл», «Атлант», «Гарызонт», МТЗ, МАЗ і Мінскі электратэхнічны завод імя Казлова.
Наступствы ад дзеянняў гэтага ўказа, лічаць прадстаўнікі бізнесу, будуць «вельмі негатыўныя не толькі для прадпрымальніцтва, але і для насельніцтва і эканомікі краіны ў цэлым». У РКП прапаноўваюць даручыць «адпаведным службам» падрыхтаваць да пасяджэння грамадскага савета «заключэнне аб эканамічных, палітычных і прававых наступствах такога рашэння», а таксама запрасіць на пасяджэнне кіраўнікоў прадпрыемстваў, якія, як мяркуецца, атрымаюць выключныя правы на імпарт.
У тым варыянце, які стаў даступны грамадскасці, праект указа ўяўляе сабой «сыры дакумент», лічыць Карагін. Праект, на яго думку, «выпадае з логікі» адносінаў, якая «выбудоўвалася паміж трыма краінамі» — Беларуссю, Расіяй і Казахстанам.
Калі ўказ будзе прыняты ў такім выглядзе, гэта «адаб'ецца на бізнес-рэйтынгу краіны і адпудзіць ад Беларусі інвестараў», перакананы старшыня прэзідыума РКП.
Цяпер чытаюць
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»2222
Каментары