Аляксандр Лукашэнка разам з малодшым сынам Мікалаем 7 студзеня, у свята Раства, наведаў мінскі Свята-Духаў кафедральны сабор.
Як паведамляе прэс-служба прэзідэнта, «кіраўнік дзяржавы павіншаваў усіх з гэтым светлым святам і пажадаў дабра, міру ў сем'ях, у краіне, а галоўнае — у душах».
Лукашэнка выказаў падзяку царкве «за той вялікі ўнёсак, які яна ўносіць у справу ўмацавання міру і спакою на беларускай зямлі». «Вы можаце абапірацца на дзяржаву, уладу. Вы заўсёды можаце быць упэўненыя, што ў нашай краіне будзе мірна і спакойна. Гэта мы гарантуем», — заявіў ён.
«Думаю, што гэты няпросты год мы пройдзем паспяхова і залогам таму — дабрыня і жаданне нашых людзей жыць у міры на зямлі, падоранай нам Богам», — сказаў Лукашэнка.
«Віншую ўсіх нашых беларусаў, усіх нашых сяброў, братоў, суседзяў. Жадаю ім таксама міру і дабра і самае галоўнае — міру нашай роднай паўднёвай суседцы. Я думаю, мы ўсё зробім для таго, каб былі мір і спакой у душах і сэрцах гэтых такіх блізкіх нам людзей», — сказаў беларускі кіраўнік.
Разам з сынам Лукашэнка запаліў свечку каля абраза Мінскай Божай Маці.
Мітрапаліт Мінскі і Заслаўскі Павел, патрыяршы экзарх усяе Беларусі ўручыў Аляксандру Лукашэнку абраз Божай Маці «Траяручыца», прывезеную з гары Афон у Грэцыі.
У сваю чаргу Лукашэнка перадаў у дар Беларускай праваслаўнай царкве сувенірнае пано, на якім намаляваны Крыжаўзвіжанскі сабор у Полацку. Пано выраблена з серабра ў тэхніцы чаканкі. Крыжаўзвіжанскі сабор, пабудаваны ў 1893 годзе, уваходзіць у комплекс Спаса-Ефрасіннеўскага манастыра ў Полацку. У гэтым саборы захоўваюцца мошчы святой прападобнай Еўфрасінні Полацкай.
Цяпер чытаюць
Сусветная зорка Джэйсан Дэрула заехаў у Беларусь. Прэм’ер Турчын вадзіў яго па Доме ўрада2
Каментары