In memoriam. Юры Шырокі
Сваё кароткае жыцьцё — 36 гадоў — ён пражыў насычана, плённа, у шырокім сэнсе творча і таленавіта. Без залішняга палітычнага патасу, нязмушана ды ўсьмешліва шчыраваў на ніве незалежнай беларускай журналістыкі.
У мінулую пятніцу ён доўга і шумна, як заўжды — з жартамі, разьвітваўся з калегамі ў офісе інфармацыйнай кампаніі БелаПАН. Разьвітваўся на ўікэнд, жадаў усім весела сустрэць стары Новы год. Аказалася — разьвітаўся назаўсёды.
Раніцой у нядзелю ягонае цела "без відавочных пашкоджаньняў" знайшлі на вуліцы ў Смаргоні (у тыя мясьціны Юра выбраўся на выходныя вудзіць рыбу). Экспэртыза канстатавала "вострую сардэчную недастатковасьць".
Калі хтосьці сыходзіць раптоўна, заўжды кажуць: ня верыцца… Тут — ня верыцца ў квадраце. Бо Юры Шырокі быў сапраўды шырокай натурай, увасабленьнем жыцьцярадаснасьці. Ягоны імпэт, зайздросная кантактнасьць ды пачуцьццё гумару ня толькі спрыялі мэнэджэрскім справам у якасьці намесьніка дырэктара БелаПАНу, але і стваралі ў калектыве нязмушаную атмасфэру, так неабходную, калі працуеш на суворым інфармацыйным канвэеры. А ў вольную хвіліну Юра станавіўся азартным спартоўцам ці душою кампаніі.
Адным зь ягоных амплюа было перакладчыцкае. Юра, выдатна ведаючы ангельскую ды іншыя мовы, быў незаменны што да працы з замежнымі спажыўцамі інфармацыі, іншаземнымі суразмоўцамі і гасьцямі БелаПАНу. У тым, што сёньня брэнд гэтай незалежнай беларускай агенцыі ведаюць у сьвеце, — несумненная заслуга Юр'я Шырокага.
Адначасна ён быў адным з тых, хто ствараў пад дахам БелаПАНу асяродак жывой беларускай мовы.
Калі ў агенцыі не ставала вольных пёраў, Юра тэрмінова закрываў гарачую тэматычную нішу ўласным матэрыялам. Пры патрэбе хутка і якасна рабіў рэпартэрскую працу. Выдаваў бліскучыя, яркія аўтарскія артыкулы на сайце "Беларускіх навінаў". Шкадаваў, што праз адміністрацыйныя клопаты не стае часу на ўласную творчасьць.
Разам з тым, сваё кароткае жыцьцё — 36 гадоў — ён пражыў насычана, плённа, у шырокім сэнсе творча і таленавіта. Без залішняга палітычнага патасу, нязмушана ды ўсьмешліва шчыраваў на ніве незалежнай беларускай журналістыкі. І проста жыў напоўніцу, з надзвычайнай шчодрасьцю адорваючы іншых добрым настроем.
У Юр'я Шырокага засталося мноства сяброў. А таму застаецца доўгая і шчырая памяць пра сьветлага чалавека.
* * *
Рэдакцыя "Нашай Нівы" шчыра спачувае родным і блізкім Юр'я Шырокага з прычыны ягонай сьмерці.
Як беларусы ў Вільні адзначылі Дзень Волі ШМАТ ФОТА4
Як беларусы ў Вільні адзначылі Дзень Волі ШМАТ ФОТА
Часам нечаканая гісторыя беларускіх гімнаў: «Мы выйдзем шчыльнымі радамі», «Пагоня», «Жыве Беларусь», «Радзіма мая дарагая», «Магутны Божа» (з ВІДЭА)1111
Каментары