Мара Касандры (Cassandra's Dream)
Вялікабрытанія – ЗША, 2007, каляровы, 108 хв.
Рэжысэр: Вудзі Алэн
Ролі выконваюць: Эван МакГрэгар, Колін Фарэл, Том Ўілкінсан, Сэлі Гоўкінз, Эшлі Мадэкўе, Гэйлі Атўэл, Клэр Хігінз, Джон Бэнфілд
Жанр: Драма
Адзнака: 7 (з 10)
У двух братоў – картачнага гульца і бізнэсмэна-пачаткоўніка – сур’ёзныя фінансавыя праблемы. Па дапамогу героі зьвяртаюцца да свайго дзядзі. Дзядзя згодны дапамагчы сваякам, але за гэта патрабуе забіць чалавека, які яму замінае…
У сваёй новай лёнданскай стужцы амэрыканскі камэдыёграф Вудзі Алэн працягвае трагедыйную праблематыку, распачатую “Матч Пойнтам”. Героі падштурхоўваюцца да забойства, пакутуюць (ці не пакутуюць) ад сумленьня, караюцца (ці не караюцца) лёсам.
“Мара Касандры” – гэта Дастаеўскі, пастаўлены ў форме камэрнай лёнданскай драмы. Абмежаваная колькасьць герояў, насычаныя дыялёгі, псыхалягічная глыбіня. Азартны Колін Фарэл – Гулец, Раскольнікаў і Ідыёт у адной асобе; стрымана-дзелавіты брат Эван МакГрэкар, эгаістычны дзядзя Том Ўілкінсан з кароннай фразай “у вас няма выбару”.
Выбар заўжды ёсьць.
70-гадовы Алэн у трагедыйна-лёгкай драме, здольнай праняць сучасную публіку, задаецца фундамэнтальнымі пытаньнямі: “Ці ёсьць Бог, калі чалавек зьдзяйсьняе злачынствы? Дзе – Божае пакараньне і Божая міласэрнасьць?”
“Мы парушылі Запаведзі! Так нельга было паступаць!” – крычыць герой Коліна Фарэла.
Фінал стужкі шакуе сваёй антычнай няўмольнасьцю. Але на працягу карціны гучалі сьведчаньні, якія сытыя спажывецкія нэапаганцы імкнуцца не заўважаць.
Цяпер чытаюць
Каспяровіча перад гібеллю дапытвалі ў польскай контрразведцы — распытвалі пра візы для агентаў ААЦ з пашпартамі прыкрыцця і пра Бульбу8
Каментары