Жыхары вуліцы Маркса бароняць свае гнёзды + фота Андрэя Лянкевіча
300 жыхароў цэнтру сталіцы пратэставалі супраць прымусовага адсяленьня.
300 жыхароў цэнтру сталіцы пратэставалі супраць прымусовага адсяленьня.
Ідэя сталічных уладаў адсяліць вуліцу Маркса ў самым цэнтры гораду выклікала прадказальны пратэст яе заможных жыхароў. У суботу каля кавярні «Грунвальд» сабраўся першы пікет. Каля 300 разьюшаных жыхароў, якія стаяць перад пэрспэктывай страты дзясяткаў тысяч даляраў на пераезьдзе ў спальныя раёны, выйшлі на вуліцу з транспарантамі «Александр Григорьевич, защитите пенсионеров».
Паводле задумы гарвыканкаму, вуліца Маркса мае стаць пешаходнай. Чыноўнікі задумалі пад шумок асвоіць каштоўныя кавалкі зямлі. Фармальнае права перасяліць жыхароў яны маюць -- уласнасьць у Беларусі ня ёсьць недатыкальнай. Каб вызваліць месца пад гатэль з казіно – выпадак аналягічны з бэрнардынамі -- яны маюць выселіць жыхароў з васьмі дзясяткаў кватэраў. Аднак калі на абарону старажытнага кляштара ўстала толькі жменька каталікоў і моладзі, на Маркса ўладам прыйдзецца мець справу з сотнямі абураных жыхароў.
У якасьці новае айчыны ім прапаноўваецца мікрараён Лошыца на ўскрайку Менску. Але цана квадратнага мэтра жытла на Маркса складае $3700 даляраў, а ў Лошыцы -- толькі $2000. Дый рушыць зь месца, дзе жыцьцё пражылі, няма ахвотных.
Пратэст быў арганізаваны: “марксісты” загадзя нарыхтавалі плякаты.
Людзі ў натоўпе прысягалі, што «лягуць касьцьмі, але не выедуць». Некаторыя зь іх набылі тут жытло нядаўна, нарабіўшы пазык.
Актыўны ўдзел у пратэсьце браў пісьменьнік Уладзімер Арлоў, што жыве тутсама. Ён трымаў плякаты «Толькі ў роднай кватэры напішу бэстсэлер». Іншы чалавек прыйшоў з цытатай з «Раскіданага гнязда»: «Ніхто нас адсюль ня згоніць і ня выстрашыць». Героі Купалы, як вядома, свайго котлішча не ўсьцераглі. Жыхары вуліцы Маркса спадзяюцца на лепшае.
Да пратэстоўцаў прыбылі намесьнік кіраўніка адміністрацыі Ленінскага раёну Аляксандар Красуцкі, дырэктар УКБ Ленінскага раёну Леанід Казакоўскі і прадстаўнік «Менскпраекту» сп.Рыбнікаў. Чыноўнікі пераконвалі, што праект па высяленьні пакуль не зацьверджаны. У адказ мітынгоўцы паказалі чыноўнікам копію дакумэнту, у якім значыцца: «жыхары дамоў супраць рэканструкцыі вуліцы... таму плянуецца іх высяленьне». Дакумэнт быў падпісаны тымі ж чыноўнікамі, якія прыйшлі на сустрэчу.
Пасьля кароткай паўзы чыноўнікі прапанавалі сустрэцца яшчэ раз «у спакойнай абстаноўцы».
Фота Андрэя Лянкевіча
Каментары