Італьянская армія вырошчвае марыхуану, каб зрабіць яе больш таннай
Хворыя, якім у Італіі выпісваюць рэцэпты на медычную марыхуану, пакутуюць ад занадта высокіх коштаў на легальны прадукт, піша сайт Бі-Бі-Сі.
Каб дапамагчы гэтым людзям, італьянскія вайскоўцы знайшлі нечаканае выйсце — пабудаваць адмысловую ферму на тэрыторыі вайсковай фармацэўтычнай фабрыкі. Цяпер яны спадзяюцца павялічыць вытворчасць медычнай марыхуаны да такога ўзроўню, каб яна стала больш таннай.
«Мэта аперацыі — зрабіць медычны прадукт дасягальным для пацыентаў», — адзначыў палкоўнік Антоніо Медыка. Ваенны аб'ект да таго ж мае добрую сістэму бяспекі і кантролю.
Мэта ваенных медыкаў — знізіць кошт прадукту да 15 ці нават 5 еўра за грам, сказаў вайсковец. Цяпер адзін грам з-за дэфіцыту нават абсалютна легальна можна набыць прыкладна за 35 еўра.
У 2014 годзе італьянскі суд адмяніў закон, які цалкам забараняў спажыванне «траўкі», аднак гандаль, захаванне і вытворчасць марыхуаны ў медычных мэтах жорстка рэгулююцца, і пастаўкі яе не паспяваюць за попытам. Гэта спрыяе нелегальным пастаўкам наркатычнага сродку ў Італію праз мафіёзныя каналы.
У медычных мэтах марыхуану выкарыстоўваюць у асноўным як сродак супраць хранічных боляў. Спецыялісты дагэтуль спрачаюцца пра плюсы і мінусы медычнага выкарыстання і легалізацыі марыхуаны.
Каментары