Сьледзтва супраць выдаўца бюлетэню «Бойкі Клецк» распачатае ў шосты раз.
Сьледзтва супраць выдаўца бюлетэню «Бойкі Клецк» распачатае ў шосты раз.
Клецкая пракуратура аднавіла допыты мясцовага актывіста апазыцыі Сяргея Панамарова. Позву яму даставілі арыгінальным чынам — пакінулі яе ўночы ў плоце. «Мяне выклікалі на гутарку ў РУУС 18 лютага, праўда не напісалі ў якасьці каго», — паведаміў С. Панамароў. На допыт ён не зьявіўся і тады яму прапанавалі завітаць у міліцыю па тэлефоне. Не дачакаўшыся выдаўца «Бойкага Клецку», міліцыянты ўвечары 19 лютага прыйшлі самі. «Я ўсё ж пагадзіўся ў апошні раз напісаць свае тлумачэньні адносна новай справы» — кажа сп. Панамароў. Нагадаем, што ў пазамінулым годзе ў мясцовы жыхар Дзьмітры Краўцоў скраў у яго пароль доступу ў Інтэрнэт. Суд прыцягнуў Краўцова да крымінальнай адказнасьці і абавязаў вярнуць Панамарову грошы. Пазьней рэдактар бюлетэню разьмясьціў у сваім выданьні гутарку з Д. Краўцовым, дзе той красамоўна, не выбіраючы выразаў, апісвае гісторыю свайго затрыманьня.
«Тое «інтэрвію» я ўзяў з аднаго з клецкіх сайтаў, каб паказаць, што гэта за чалавек» — патлумачыў сп. Панамароў. 2 жніўня 2007 г. маці Краўцова аднесла ў клецкую міліцыю заяву нібыта паводле абразы ў друкаваным сродку. Была праведзеная праверка, пасьля якой клецкі пракурор В.Каробка пастанавіў спыніць справу за адсутнасьцю складу злачынства. Аднак на пачатку студзеня бягучага году намесьніца пракурора Валянціна Лябедзька сваім рашэньнем адмяніла пастанову свайго начальніка і пастанавіла аднавіць праверку па факце абразы ў друкаваным сродку.
Сёньня С. Панамарова ізноў выклікалі ў РУУС нібыта для ўдакладненьня некаторых дэталяў напісанай ім учора тлумачанай. Клецкі актывіст ад сустрэчы адмовіўся. Цяпер ён рыхтуе чарговы нумар сваёй газэты.
Нагадаем, што на працягу 2007 году ў дачыненьні да старшыні клецкай суполкі БНФ і выдаўца бюлетэню «Бойкі Клецк» Сяргея Панамарова пяць разоў распачыналі і прыпынялі крымінальную справу паводле ч.2 арт. 188 КК РБ (паклёп у друкаваных сродках). Нагодай для завядзеньня справы стала нататка ў «Бойкім Клецку» пра кіраўніка Клецкай юрыдычнай кансультацыі Натальлю Семашкевіч. Двойчы адмысловая экспэртыза не знаходзіла парушэньняў Крымінальнага кодэксу і справу прыпынялі за адсутнасьцю складу злачынства.
Сямён Печанко
Цяпер чытаюць
Студэнтка, якая ўцякла ад арышту ў 2020-м, працуе на крайняй поўначы Нарвегіі і зразумела скандынаўскі рэцэпт шчасця27
Каментары