Пяцігадовыя і сямігадовыя еўрааблігацыі Беларусі таргуюцца ніжэй за намінал — такія апошнія даныя Люксембургскай фондавай біржы.
Як сведчаць вынікі біржавых таргоў, якія адбыліся 6 ліпеня, кошт еўрааблігацый, якія Беларусь размясціла на пяць гадоў у жніўні 2010 года, складаў 99,5% ад наміналу. У той жа час сямігадовыя еўрааблігацыі, якія Беларусь размяшчала ў студзені 2011 года, таргаваліся па цане 96,9% ад наміналу.
Пры гэтым сярэдняя прыбытковасць па пяцігадовых еўрааблігацыях складала 15,5%, па сямігадовых — 10,4%.
Прыбытковасць па еўрабондах лічыцца бенчмаркам (арыенцірам) для вызначэння кошту новых запазычанняў. Члены беларускага ўрада раней заяўлялі пра планы па размяшчэнні новых выпускаў еўрааблігацый для прыцягнення валютных запазычанняў у 2015 годзе.
У прыватнасці, планавалася, што Банк развіцця ў 2015 годзе выпусціць еўрааблігацыі на суму не менш як 500 млн. долараў. Акрамя гэтага, меркавалася, што ў 2015 годзе беларускі ўрад размесціць чарговы выпуск еўрааблігацый на 1 млрд. долараў.
Разам з тым у снежні 2014 года на фоне абвастрэння сітуацыі на валютным рынку Беларусі прыбытковасць беларускіх еўрабондаў, якая адлюстроўвае прыкладны кошт новых запазычанняў, рэзка вырасла і з таго часу застаецца на высокім узроўні.
Міністр фінансаў Уладзімір Амарын паведаміў у чэрвені 2015 года, што Беларусь мае намер выйсці з чарговым выпускам еўрааблігацый у жніўні 2015 года.
Як паведамлялася раней, Беларусь у 2010 і ў 2011 гадах размяшчала два выпускі еўрааблігацый — пяцігадовыя і сямігадовыя на агульную суму 1,8 млрд. долараў. Размяшчэнне еўрааблігацый беларускія ўлады разглядаюць як адзін з інструментаў прыцягнення запазычанняў на знешніх рынках. У пачатку жніўня 2015 года Беларусь павінна пагасіць пяцігадовы выпуск еўрааблігацый.
Нагадаем, на пагашэнне і абслугоўванне еўрабондаў, паводле параметраў бюджэту, Беларусі ў 2015 годзе неабходна накіраваць амаль 1,2 млрд. долараў.
Цяпер чытаюць
Праца фізічнага офіса Ціханоўскай у Вільні часова прыпынена18
Каментары