Абяцаная Расіяй фінансавая дапамога Беларусі заключаецца ў рэфінансаванні крэдытаў і пазычаннях у Еўразійскага банка развіцця, паведаміў Аляксандр Лукашэнка 16 лютага на нарадзе аб мерах па павышэнні эфектыўнасці сацыяльна-эканамічнага комплексу.
«Расіяне, пры ўсёй складанасці, вуснамі і прэм'ера, і прэзідэнта Расіі, з якімі я двойчы сустракаўся за тыдзень, прама сказалі: у нас няма іншага выйсця, як падтрымліваць Беларусь, таму што нашы там інтарэсы, мы шмат у чым залежым ад Беларусі», — цытуе Лукашэнку дзяржаўнае агенцтва БелТА.
Кіраўнік дзяржавы нагадаў пра свой нядаўні візіт у Расію і адзначыў, што «былі праведзеныя вельмі сур'ёзныя перамовы з вышэйшым кіраўніцтвам». «Сітуацыя няпростая, але не смяротная. І яны кажуць: так, не смяротная ні ў вас, ні ў нас. Але мы бачым нейкія разрывы ў фінансаванні і гэтак далей, мы дапаможам, у плане рэфінансавання і запазычання праз Еўразійскі банк развіцця», — паведаміў Лукашэнка.
Ён назваў гэтае рашэнне расійскага боку пазітыўным. «Пазітыўны, нармальны трэнд на тое, каб мы разам, узяўшыся за рукі, выходзілі з гэтай складанай сітуацыі. І мы выйдзем з яе, не такія былі часы», — сказаў афіцыйны лідар.
Нагадаем, беларускія ўлады вядуць перамовы аб атрыманні двух буйных запазычанняў — крэдытаў Еўразійскага фонду стабілізацыі і развіцця на 2 млрд. долараў і МВФ на 3 млрд даляраў. Частку новых запазычанняў улады плануюць накіраваць на рэфінансаванне старых даўгоў. Плацяжы па абслугоўванні і пагашэнні знешняга дзярждоўгу, якія трэба будзе ажыццявіць у 2016 годзе, Мінфін ацэньвае ў 3,3 млрд даляраў.
Цяпер чытаюць
«Патраціла 300 рублёў — а яшчэ толькі сярэдзіна чэрвеня!» Беларусы абмяркоўваюць выдаткі на пакос травы і дзеляцца лайфхакамі3
Каментары