У кватэру каардынатара кампаніі «За справядлівыя выбары» Артура Фінькевіча ломіцца міліцыя
Фінькевіч таксама з'яўляецца даверанай асобай кандыдата ў дэпутаты, старшыні аргкамітэта па стварэнні грамадскага аб'яднання «Экаград» Віктара Янчурэвіча, які балатуецца па Партызанскай выбарчай акрузе № 110 Мінска.
Як паведаміў Фінькевіч БелаПАН, з 7 гадзін раніцы яму настойліва грукаюць і звоняць у дзверы, тэлефануюць на хатні тэлефон і нават грукаюць у вокны кватэры, якая размешчана на першым паверсе шматпавярховага жылога дома.
Актывіст заявіў, што з самай раніцы сёння павінен быў знаходзіцца на выбарчым участку. Ён лічыць, што спецслужбы такім чынам спрабуюць процідзейнічаць працы кампаніі назірання, і баіцца, што, калі выйдзе з кватэры, яго могуць затрымаць.
Фінькевіч нагадаў, што кампанія «За справядлівыя выбары» ў часе назірання за датэрміновым галасаваннем ужо накіравала шэраг скаргаў на фальсіфікацыі, а таксама парушэнні падчас галасавання.
Каментары