Каляды для большасці жыхароў Нямеччыны хіба самае чаканае і любімае свята. Да яго рыхтуюцца цягам месяца, і ўвесь гэты перадсвяточны час поўны прыемных сюрпрызаў і падарункаў. Сёння, 24 снежня, калі пачне цямнець, ажыўленне і мітусня з вуліц знікне — у Святы вечар немцы імкнуцца наведаць святую Імшу, а далей правесці час дома разам з самымі блізкімі людзьмі. 25 снежня яны зноў збяруцца ў сямейным коле за святочным абедам.
Калі вы яшчэ не адшукалі святочны настрой, самы час зірнуць Instagram немцаў, да якіх свята ўжо прыйшло.
Ялінка
Чарговую порцыю падарункаў, якія чакаюць пад ялінкамі, распакуюць 24 снежня ўвечары пасля святочнай сямейнай вячэры.
6 снежня Святы Мікалай ужо прыносіў паслухмяным дзецям розныя прысмакі і іншыя прыемныя дробязі.
«Мы жадаем вам вясёлых Калядаў са сваімі блізкімі! Атрымлівайце асалоду ад кожнага моманту і будзьце ўдзячныя!» — гаворыцца ў допісе.
Калядны вянок
У Нямеччыне вельмі адчуваецца набліжэнне свята. Амаль у кожным доме ёсць калядны вянок з чатырма свечкамі. Першую з іх запальваюць за чатыры тыдні да Калядаў, у дзень, калі пачынаецца Адвэнт — перадкалядны час. Другую свечку запальваюць праз тыдзень, трэцюю — яшчэ праз тыдзень. Калі гараць усе чатыры свечкі, значыць, свята ўжо на парозе.
Калядны каляндар
Ёсць і яшчэ адна традыцыя адліку часу да Калядаў. У доме вешаюць «смачны» каляндар на 24 дні снежня. Пад кожнай лічбай хаваецца цукерка ці шакаладка.
Некаторыя рыхтуюць 24 падарункі і кожны дзень дораць новы пакуначак з нумарам.
Каляднае печыва
Напярэдадні свята многія імкнуцца загадзя прыгатаваць каляднае печыва. Звычайна гэта весела і займальна як для дарослых, так і для дзяцей.
Асобна трэба сказаць пра імбірныя пернікі, якія ў Нямеччыне вельмі любяць. Яшчэ адзін атрыбут свята.
Калі казаць пра калядны стол, то звычайна на ім ёсць запечаная гуска. І чым яна больш тлустая, тым лепш. Птушка можа быць запечаная з чарнаслівам і яблыкамі, палітая віном, фаршыраваная або пададзеная з клёцкамі. Карацей, залежыць ад гаспадыні. На гарнір звычайна падаецца бульбяная салата. Робіцца яна вельмі проста: да адварной бульбы дадаецца марынаваны агурок альбо рэпчатая цыбуля. Усё запраўляецца маянэзам.
Калі казаць пра напоі, то ў гэты зімовы час немцы аддаюць перавагу глінтвейну.
Кірмашы
Калядныя кірмашы гудзелі якраз да 24 снежня. Кожны шукаў упрыгажэнні ў дом, падарункі блізкім і сябрам, прысмакі на святочны стол. Пасля выхадных яны паступова будуць зварочвацца.
А вось Новы год, у адрозненне ад Калядаў, немцы святкуюць шумна, разам з сябрамі. Збіраюцца на плошчах горада, у рэстаранах і барах, весяляцца і адпачываюць. У гэты дзень не прынята дарыць вялікіх падарункаў, імі абменьваюцца на Каляды. У новы год у Нямеччыне прынята «ўваходзіць» з усім новым, таму ў гэты дзень дастаюць новыя рэчы. І жадаюць немцы адзін аднаму не наступлення Новага года, а добрага «ўезду», «уваходжання» ў новы год.
Цяпер чытаюць
Легендарная журналістка Любоў Лунёва расказала пра Віктара Лукашэнку і аднакурснікаў, стварэнне «Вясны» і палітычны бамонд17
Каментары