У 2017 годзе ў Беларусі плануецца пабудаваць 3,5 млн квадратных метраў жылля
У 2017 годзе ў Беларусі плануецца пабудаваць за 3,5 млн квадратных метраў жылля. Гэта прадугледжана пастановай урада № 1113 ад 29 снежня 2016 года «Аб мерах па выкананні заданняў на 2017 год па будаўніцтве жылых дамоў, аб'ёмах уводу ў эксплуатацыю і фінансавання будаўніцтва жылля і аб'ектаў інжынернай і транспартнай інфраструктуры ў 2018 годзе», якая апублікаваная на сайце Саўміна.
Найбольшая колькасць квадратных метраў за год павінна з'явіцца ў Мінскай вобласці (972 тыс.), найменшая — у Магілёўскай (280 тыс.). У Мінску будзе пабудавана не больш за 644 тыс. квадратных метраў жылля.
Паводле разлікаў распрацоўшчыкаў дакумента, аб'ёмы фінансавання будаўніцтва складуць за год 3,7 млрд рублёў: 160 млн будуць накіраваныя з кансалідаванага бюджэту, 245 млн — крэдытныя рэсурсы банкаў, уключаючы льготнае крэдытаванне, 2,86 млрд — уласныя сродкі грамадзян, 439 млн — сродкі арганізацый, уключаючы пазыкі, замежныя крыніцы. Такім чынам, ва ўрадзе разлічваюць, што гадавая праграма будаўніцтва жылля будзе больш чым на 77% прафінансаваная з уласных сродкаў насельніцтва.
Крэдыты на будаўніцтва жылля на самастойна вызначаных умовах будуць выдзяляць пяць банкаў: «Беларусбанк», «Белаграпрамбанк», «БПС-Ашчадбанк», «Прыёрбанк» і «Банк БелВЭБ». Агульны аб'ём такога крэдытавання не перавысіць 27 млн рублёў. Пры гэтым першыя два банкі насельніцтва пракрэдытуюць яшчэ на 30 млн — па стаўках, паменшаных на 50% стаўкі рэфінансавання. Гэтыя крэдыты прадугледжаныя для грамадзян, якія стаяць на ўліку для паляпшэння жыллёвых умоў, страты банкаў кампенсуюцца з рэспубліканскага бюджэту.
Плануецца пабудаваць 260 тыс. квадратных метраў жылля для 4.329 шматдзетных сем'яў, мяркуецца, што на гэтыя мэты будзе выдзелена 128 мільёнаў рублёў ільготных крэдытаў, а каля 23 млн рублёў складуць іх уласныя сродкі. Ва ўрадзе таксама разлічваюць за год узвесці 22,85 тыс. квадратных метраў сацыяльнага жылля.
У бягучым годзе ў гарадах-спадарожніках прапануецца пабудаваць 10,6 тыс. квадратных метраў жылля для 155 грамадзян. Асвойвацца ў якасці такіх будуць толькі Жабінка Брэсцкай вобласці і Скідаль Гродзенскай вобласці. Забудова гарадоў-спадарожнікаў Мінска не прадугледжаная.
Акрамя таго, пастановай устаноўлены гранічны нарматыў кошту 1 квадратнага метра агульнай плошчы жылога памяшкання ў 660 рублёў; гранічны паказчык кошту 1 квадратнага метра агульнай плошчы жылога дома (кватэры) у памеры, якi не перавышае 940 рублёў, для выдачы льготнага крэдыту «Белаграпрамбанкам» у адпаведнасці з указам прэзідэнта ад 2 верасня 1996 года № 346 «Аб некаторых мерах па развіцці жыллёвага будаўніцтва на вёсцы»; гранічны нарматыў кошту 1 квадратнага метра агульнай плошчы жылога памяшкання ў 940 рублёў для выдачы льготнага крэдыту на будаўніцтва (рэканструкцыю) аднакватэрных, блакіраваных жылых дамоў «Беларусбанкам» шматдзетным сем'ям, якія пастаянна пражываюць і працуюць у сельскіх населеных пунктах.
Аналагічны агульны аб'ём уводу жылля пастановай зацверджаны і на 2018 год.
Пра скарачэнне агульнага гадавога аб'ёму будаўніцтва жылля ў Міністэрстве архітэктуры і будаўніцтва заяўлялі яшчэ ўлетку 2016 года. На прэс-канферэнцыі 4 жніўня міністр архітэктуры і будаўніцтва Анатоль Чорны сказаў: «На 500 тысяч пакуль плануецца менш [пабудаваць жылля]. <…> Усё залежыць ад таго, як скончыцца наша планаванне бюджэту». Паводле яго слоў, на той момант лічба 3,5 млн квадратных метраў не задавальняла прэм'ер-міністра Андрэя Кабякова.
У 2016 годзе планавалася пабудаваць 4 млн квадратных метраў жылля. Паводле звестак Белстата, у студзені—лістападзе мінулага года ў эксплуатацыю ўведзена 3 млн 829,4 тыс. квадратных метраў жылля, на 17,2% менш у параўнанні з аналагічным перыядам 2015 года.
Каментары