Ваенна-тэхнічныя праекты «Саюзнай дзяржавы» — на што аддалі 60 мільёнаў даляраў
Тры праграмы «Саюзнай дзяржавы» у сфере абароннага і ваенна-тэхналагічнага супрацоўніцтва былі выкананыя ў 2016 годзе, паведаміла газета Мінабароны Беларусі «Во славу Родины».
Гэта праграмы «Умацаванне памежнай бяспекі Саюзнай дзяржавы на перыяд 2012—2016гг», праграма «Компомат», якая датычыцца тэхналогій стварэння кампазітных матэрыялаў, а таксама праграма «Саюзны цеплавізар».
Поўная назва праграмы «Компомат» — «Распрацоўка інавацыйных тэхналогій і тэхнікі для вытворчасці канкурэнтназдольных кампазіцыйных матэрыялаў, матрыц і арміруючых элементаў на 2012—2016 гг». Беларусь уклала ў праграму 487 млн расійскіх рублёў з бюджэта «Саюзнай дзяржавы», Расія — 904 млн. Яшчэ прыкладна столькі ж кожная краіна знайшла з пазабюджэтных крыніц. Такім чынам агульнае фінансаванне склало каля 2,8 млрд расійскіх рублёў за 4 гады, сведчыць сайт Пастаяннага камітэта «Саюзнай дзяржавы».
З беларускага боку праграму курыраваў канцэрн Белнафтахім, мэтай праграмы была распрацоўка розных шматфункцыянальных палімерных і вуглеродных матэрыялаў з новымі якасцямі трываласці (у тым ліку вогне- і тэрматрываласці), масы, гукапаглынання. Таксама павінны былі распрацоўвацца новыя змазачныя матэрыялы і мадыфікаваныя эпаксідныя смолы.
«Саюзны цеплавізар» каштаваў абедзвюм краінам прыкладна па 0,5 млрд расійскіх рублёў, закуп ажыццяўляўся з 2013 года. Мэтай было імпартазамяшчэнне — распрацоўка элементаў для новай цяпловізійнай тэхнікі вайсковага і цывільнага прызначэння. З беларускага боку асноўную працу рабіў «Інтэграл», а сувыканаўцам была кампанія «Планар». Напачатку 2016 года лічылася, што праграма акупіцца за 6 гадоў.
Агульныя выдаткі на дзве закончаныя ў 2016 годзе ваенна-тэхнічныя праграмы склалі каля 3,8 млрд расійскіх рублёў — прыкладна $60 мільёнаў па сучасным курсе.
Цяпер чытаюць
Хто тыя 17‑гадовы блогер і яго 37‑гадовая нявеста, якія шыкоўна жылі на грошы са збору на хворае дзіця?30
Каментары