У ЗША памерла іранскі матэматык Марыям Мірзахані, якая стала тры гады таму першай у гісторыі жанчынай - лаўрэатам Філдсаўскай прэміі, самай прэстыжнай прэміі па матэматыцы, паведамляе ВВС.
Паколькі Нобелеўская прэмія матэматыкам не ўручаецца, Філдсаўскую прэмію часта называюць «Нобелеўскай прэміяй для матэматыкаў».
Марыям Мірзахані было 40 гадоў. У 2013 годзе ў яе быў дыягнаставаны рак грудзей. Як паведамляецца, некалькі тыдняў таму ў яе выявіліся метастазы ў касцяным мозгу.
Мірзахані прысудзілі Філдсаўскую прэмію ў 2014 годзе за выдатны ўклад у дынаміку і геаметрыю рыманавых паверхняў і тэорыю прастор іх модуляў. Такім чынам, яна стала першай жанчынай-лаўрэатам і першым лаўрэатам з Ірана.
«Я спадзяюся, што гэтая ўзнагарода натхніць многіх дзяўчат і маладых жанчын — у гэтай краіне і па ўсім свеце — і дапаможа ім паверыць у свае сілы і магчымасць стаць лаўрэатам Філдсаўскай прэміі», — сказала тады член журы Франсэс Кіруон.
Філдсаўская прэмія ўручаецца з 1936 года адзін раз у чатыры гады на кожным міжнародным матэматычным кангрэсе. Лаўрэатамі становяцца двое, трое ці чацвёра маладых матэматыкаў не старэйшыя за 40 гадоў.
Мірзахані нарадзілася 3 мая 1977 года. Будучы падлеткам, яна двойчы — у 1994 і 1995 гадах — станавілася пераможцай Міжнароднай алімпіяды па матэматыцы. У 1999 годзе яна пераехала ў ЗША.
У 2004 годзе Мірзахані атрымала доктарскую ступень па матэматыцы ў Гарвардскім універсітэце. Яна спецыялізавалася на геаметрыі Лабачэўскага, тэорыі Тэйхмюлера, эргадычнай тэорыі і сімплектычнай геаметрыі.
З 2008 года яна выкладала ў Стэнфардскім універсітэце.
Цяпер чытаюць
На мітынгу ў Вільні затрымалі правакатара. А Ціханоўскі заявіў пра намер дабівацца сустрэчы з Зяленскім19
Каментары