Балы за заданне абітурыент будзе ведаць загадзя: як будзе мяняцца сістэма падліку балаў на ЦТ
У гэтым годзе Рэспубліканскі інстытут кантролю ведаў апрабаваў новую методыку падліку вынікаў ЦТ. Пра гэта на прэс-канферэнцыі распавяла першы намеснік дырэктара РІКВ Наталля Вайцяховіч.
Перш за ўсё Наталля Вайцяховіч удакладніла: вынікі ЦТ гэтага года ацэньваліся па ранейшай методыцы, «якая зацверджана загадам міністэрства адукацыі і выкарыстоўвалася на працягу больш за 12 гадоў».
— Мы можам казаць пра мадэльную апрабацыю. Вынікі ЦТ гэтага года былі разлічаны і па ранейшай, і па новай методыцы.
У чым яна заключаецца? Галоўнай перавагай новай сістэмы падліку Наталля Вайцяховіч называе празрыстасць.
— Вынікі будуць больш празрыстымі. Кожнаму заданню з варыянту тэсту будзе прысвойвацца першасны бал, які абітурыенты змогуць убачыць яшчэ да пачатку цэнтралізаванага тэставання. Ён будзе вызначаны і зацверджаны спецыфікацыяй, якую штогод зацвярджае Міністэрства адукацыі. Затым у працэсе праверкі работ абітурыентаў будуць уведзены каэфіцыенты. Далей будзе разлічаны тэставы выніковы бал. Свой ранг абітурыенты змогуць убачыць у нас на сайце.
Методыка, падкрэсліла Наталля Вайцяховіч, у сусветнай практыцы не новая: яна выкарыстоўваецца ў многіх краінах. Выкарыстоўваць яе ў Беларусі могуць пачаць ужо ў наступным годзе.
- У выніках мадэльнай апрабацыі мы ўбачылі шмат плюсаў. Пытанне знаходзіцца ў стадыі рашэння.
Зараз, нагадаем, пры ацэнцы цаны пытання ўлічваецца ў тым ліку і тое, колькі чалавек адказалі на яго правільна.
Каментары