Знешне ID-карта будзе падобная на банкаўскую, але на гэтым падабенства заканчваецца. Новы дакумент заменіць беларусам пашпарт, дазволіць атрымліваць паслугі дзяржаўных структур, а з часам з такой карткай можна будзе выязджаць за мяжу. Планавалася, што ID-карты пачнуць выдаваць з 1 студзеня 2019 года, але тэрмін перанеслі на год.
— Гэты біяметрычны праект рэалізуецца яшчэ з адным вельмі цікавым і глабальным праектам для нашай краіны — Беларускай інтэграванай сэрвісна-разліковай сістэмай (БІСРС). І да 1 студзеня 2019 года праекты мусілі быць гатовымі, але, на жаль, сістэма не гатовая, таму і выпуск ID-карты пакуль немэтазгодны, — тлумачыць Павел Хрышчановіч, намеснік начальніка ўпраўлення па грамадзянстве, пашпартнай працы і выездзе за мяжу МУС.
У МУС адзначаюць: з іх боку ёсць усе магчымасці выдаваць новы дакумент з 2019 года, але толькі ID-карта не будзе мець усіх праграм, не зможа падключыцца да сістэмы. Гэта будзе «голы» пластык без начыння і магчымасцей. Таму прынялі рашэнне перанесці тэрмін выдачы ID-карты на год.
— Толькі гэта не значыць, што 1 студзеня 2020 года ўсе беларусы абавязкова павінны будуць атрымаць ID-карту і біяметрычны пашпарт, — каментуе Павал Хрышчановіч. — Усе раней выдадзеныя пашпарты будуць сапраўдныя.
У чалавека будзе выбар: пачакаць, пакуль скончыцца тэрмін дзеяння пашпарта, або па жаданні замяніць яго на ID-карту. Яе кошт будзе ў межах адной базавай велічыні (сёння гэта 24,50 рубля), і яна стане своеасаблівым унутраным пашпартам. Акрамя таго, ID-карта дапаможа атрымліваць паслугі дзяржаўных структур. Напрыклад, з яе дапамогай можна будзе замовіць даведку.
Плануецца, што як толькі ID-карты запрацуюць у Беларусі, наша краіна пачне перамовы з іншымі дзяржавамі, каб беларусы маглі падарожнічаць з гэтым дакументам. Знешне яна будзе выглядаць, як банкаўская картка, на ёй дзве фатаграфіі — каляровая і чорна-белая. Па словах спецыялістаў, падрабіць ID-карту будзе немагчыма, таму што на ёй вялікая колькасць ступеняў абароны.
Дарэчы, біяметрычны пашпарт атрымаюць не ўсе, а толькі тыя, хто будзе выязджаць за мяжу. Плануецца, што кошт гэтага дакумента будзе складаць 3 базавыя велічыні (сёння гэта 73 рублі 50 капеек).
Цяпер чытаюць
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню16
Каментары