Супрацоўнікам праваахоўных органаў трэба мяняць стыль сваёй работы і павышаць яе якасць. Пра гэта паведаміў сёння журналістам дзяржаўны сакратар Рады бяспекі Станіслаў Зась пасля нарады Лукашэнка з праваахоўным блокам, перадае БЕЛТА.
Па словах Станіслава Зася, галоўнае патрабаванне кіраўніка дзяржавы да праваахоўнікаў заключаецца ў тым, каб пры расследаванні крымінальных спраў не пацярпеў ніводны невінаваты чалавек, і ў той жа час была забяспечана няўхільнасць пакарання. «Гэта непазбежная ўмова для таго, каб краіна жыла стабільна, у прававым полі і панаваў закон», — падкрэсліў дзяржсакратар.
Пасля нарады на прэзідэнцкім узроўні праца сілавікоў будзе падрабязна прааналізавана ў саміх праваахоўных органах, іх рэгіянальных падраздзяленнях, а таксама на міжведамасных сустрэчах. «Трэба мяняць некаторыя падыходы ў працы, стыль і, вядома, павышаць яе якасць», - сказаў Станіслаў Зась.
У прыватнасці, адзначыў ён, неабходна дэталёва разабрацца з крытэрамі ацэнкі дзейнасці праваахоўнікаў. Напрыклад, пры расследаванні нарказлачынстваў некаторыя супрацоўнікі імкнуцца любой цаной паказаць вынік, і пачынаюцца перагіны.
Пры гэтым галоўная задача — пошук і спыненне буйных каналаў збыту наркотыкаў — не вырашаецца.
Каментары