У двух вучняў мінскай танцшколы COVID-19, у тым ліку ў медыка з аддзялення пульманалогіі
Адна са сталічных танцавальных школ сыходзіць на каранцін. Прычына — пацвердзіўся каранавірус у двух вучняў. Спачатку забралі ў бальніцу вучаніцу, якая працуе ў адной з мінскіх бальніц, у пульманалагічным аддзяленні, піша Tut.by.
Пра тое, што ў адной з вучаніц танцавальнай школы пацвердзіўся дыягназ COVID-19, трэнер Валерый Юруць папярэдзіў іншых вучняў яшчэ 29 сакавіка на сваёй старонцы «Укантакце». У танцшколы два філіялы — спачатку інфекцыя праявілася ў дзяўчыны, якая займаецца на вуліцы Кальварыйскай.
Вучаніца працуе ў адной са сталічных бальніц у аддзяленні пульманалогіі, дзе займаюцца дыягностыкай і лячэннем захворванняў лёгкіх і дыхальных шляхоў. Пакуль няма інфармацыі, на якой пасадзе.
«Да 27 сакавіка (пятніца) у іх не было хворых на каранавірус. Таму яна не бачыла прычын не хадзіць на заняткі», — адзначае выкладчык танцаў.
Ён дадае, што ў апошнія разы на групавых занятках мінчанка была ў сераду 25 сакавіка і ў чацвер 26 сакавіка. Акрамя таго, у дзяўчыны ёсць хранічнае захворванне, якое суправаджаецца кашлем, так што яна не расцэньвала гэты сімптом як прыкмету хваробы.
29 сакавіка выкладчык адзначаў, што санслужба бярэ на кантроль ўсіх, хто кантактаваў з дзяўчынай, а частка школы танцаў з засцярогі сыдзе на двухтыднёвы каранцін. Зрэшты, да аўторка, 31 сакавіка, сітуацыя ўскладнілася — COVID-19 пацвердзіўся і ў хлопца, які займаўся з дзяўчынай у адной групе.
— У нас ужо два інфікаваных і 28 кантактаў першага ўзроўню, якія пад наглядам санстанцыі — нехта ў бальніцы, хтосьці на самаізаляцыі. Плануем сыходзіць на каранцін — з адменай групавых заняткаў па парных танцах на месяц, дамаўляліся з арэндадаўцамі, — растлумачыў TUT.BY Валерый Юруць.
Суразмоўца дадае, што іх школа не адзіная ў Мінску, якая цяпер сыходзіць на каранцін.
— Школы, якія плацяць пагадзінную арэнду за памяшканні, зачыніліся, хоць там і няма хворых — мала людзей ходзіць, і ім нявыгадна здымаць залы. Некаторыя вырашылі перастрахавацца і адмянілі заняткі. Пры пагадзіннай арэндзе яны хаця б не ўваходзяць у страту. У нас поўная арэнда, таму да апошняга даводзілася працаваць. Ды і прамых пагрозаў не было: у студыі прымаліся меры санапрацоўкі і дэзінфекцыі, Міністэрства аховы здароўя заяўляе, што кантралюе сітуацыю.
Адзначым, што раней пра выпадкі заражэння медыкаў не паведамлялася. На днях дактары ў Беларусі абмяркоўвалі паміж сабой новае правіла — пра тое, што з 25 сакавіка медыцынскіх работнікаў, якія кантактавалі з заражанымі каранавірусам пацыентамі, не шпіталізуюць. Яны павінны заставацца на працы, пры гэтым у іх возьмуць мазкі на каранавірус і будуць мераць тэмпературу. TUT.BY высылаў запыт у Міністэрства аховы здароўя з просьбай пракаментаваць сітуацыю, аднак адказу да гэтага часу не атрымаў.
Каментары