«Каштоўнасць — гэта людзі»: Згуртаванне беларусаў свету заклікала ўлады адмяніць парад

Згуртаванне беларусаў свету «Бацькаўшчына» і Саюз беларускіх пісьменнікаў заклікаюць улады адмяніць публічныя мерапрыемствы. 

«Згуртаванне беларусаў свету «Бацькаўшчына» злучае ў сваіх шэрагах прадстаўнікоў беларускай дыяспары з больш чым дваццаці краін свету, людзей самых розных прафесій і поглядаў, паяднаных любоўю да сваёй Радзімы і клопатам пра яе. Саюз беларускіх пісьменнікаў прадстаўляе меркаванне беларускай нацыянальнай культурнай інтэлігенцыі, стваральнікаў сучаснай беларускай культуры. Мы выказваем сваю глыбокую занепакоенасць працэсамі, што зараз адбываюцца ў краіне, — высокай хуткасцю распаўсюджання захворвання COVID-19 і адсутнасцю эфектыўных захадаў па супрацьстаянні вірусу з боку беларускіх уладаў», — гаворыцца ў заяве.

«Распаўсюджанне захворвання ў нашай краіне выявіла востры недахоп сродкаў і матэрыялаў, неабходных медыкам для якаснага і бяспечнага выканання сваёй працы.

Невыразная пазіцыя беларускіх уладаў, якія дапускаюць сумяшчэнне сур’ёзных супрацьэпідэмічных захадаў з паблажлівай і легкадумнай рыторыкай адносна небяспекі хваробы, змусіла нас звярнуцца са зваротам аб пасільнай дапамозе да сусветнай беларускай грамады, якая адгукнулася, нягледзячы на тое, што таксама ў сваёй большасці знаходзіцца ў падобных складаных варунках.

Дзясяткі грамадскіх ініцыятываў па зборы дапамогі шпіталям і медыкам дзейнічаюць і ў самой Беларусі. Але асноўная роля ў барацьбе з гэтай сусветнай бядою павінна належаць дзяржаве.

Досвед краінаў, у якіх атрымалася пераламаць дынаміку распаўсюду віруса, а таксама матэрыялы адмыслова складзеных для Беларусі парадаў Сусветнай арганізацыі аховы здароўя (СААЗ), дазваляюць нам меркаваць, што адным з галоўных чыннікаў мусіць быць адмена ўсіх масавых мерапрыемстваў, інфармаванне грамадзянаў аб небяспецы, якую нясе COVID-19, а таксама выкананне санітарных патрабаванняў і сацыяльнага дыстанцыявання.

Мы ведаем, што шмат арганізацый беларускай грамадзянскай супольнасці і бізнэс-структураў, дбаючы пра здароўе сваіх супрацоўнікаў, перайшлі на дыстанцыйную працу, не чакаючы адпаведных захадаў з боку дзяржавы».

«Самая галоўная каштоўнасць нашай краіны — гэта людзі. Клопат пра іх жыццё і здароўе — наш агульны прыярытэт», — падкрэсліваецца ў заяве.

«А таму мы звяртаемся да беларускіх уладаў з патрабаваннем адмяніць правядзенне парада 9 мая ў сталіцы Беларусі Мінску. Мы разумеем, што 75-годдзе Перамогі — важная для беларускай дзяржавы падзея, але святкаванне юбілею не павінна весці да новых ахвяраў сярод беларусаў у мірны час.

Сродкі, якія могуць быць затрачаныя на гэтае святкаванне, варта накіраваць на нарошчванне рэсурсу медыцынскіх устаноў, набыццё матэрыялаў і сродкаў для барацьбы з пандэміяй, а таксама на падтрымку прадстаўнікоў уразлівых да каранавіруса груп грамадзянаў», — зазначаюць аўтары звароту.

• 0
• 0
• 0
• 0
• 0
• 0
• 0
• 0