10 чэрвеня прызначана паседжаньне ў судзе па адміністрацыйнай справе ў дачыненьні жыхара Гомеля Віталя Смоліча. Яго хочуць судзіць за ўдзел у акцыі падтрымкі Сяргея Ціханоўскага 7 мая, піша Радыё Свабода.
У Віталя — пацьверджаны каранавірус. Віталь быў шпіталізаваны ў бальніцу хуткай медыцынскай дапамогі з хваробай сэрца. Туды яму прыходзілі SMS з суда з патрабаваннем з'явіцца для разгляду справы.
«Я адказваў ім, што не магу прыйсьці, бо ляжу ў шпіталі. Мне з суда даслалі адказ па SMS, што не могуць знайсьці мяне па тэлефоне. У нядзелю мне прыйшоў станоўчы тэст на каранавірус, і мяне выпісалі дахаты. І зноў прыйшла SMS, каб я 10 чэрвеня з'явіўся на суд», — расказаў Свабодзе Смоліч. Ён кажа, што і не ведаў пра адміністрацыйны пратакол, а пра суд даведаўся толькі з SMS.
«Ну натуральна я нікуды не пайду з каранавірусам», — дадаў актывіст.
Пасьля акцыі 7 мая ў Гомелі супрацоўнікі АМАП затрымалі 20 чалавек. 6 удзельнікаў акцыі былі пакараныя арыштам тэрмінам на 15 сутак — Юры Уласаў, Іван Рамязоўскі, Віталь Грыцкоў, Дзмітрый Лукомскі, Сяргей Маслаў і Аляксей Думянкоў. Астатнія атрымалі штрафы — сумарна 1998 рублёў.
Сёння ў судзе Цэнтральнага раёна пройдзе чарговае паседжаньне за акцыю 7 мая. Будуць судзіць Алу Грэчка, сябра ініцыятыўнай групы Святланы Ціханоўскай.
Цяпер чытаюць
Памятаеце палітвязня Вітухноўскага, які пайшоў ваяваць за Расію? Ён ужо загінуў6
Каментары