Пакуль публіка бедавала, што праз сыход купалаўцаў з будынка на Энгельса адмяняецца і чаканая прэм’ера легендарных «Тутэйшых», калектыў цішком працягваў рэпетыцыі і ўрэшце запрасіў гасцей на закрытую «рэпетыцыю» спектакля. Учора купалаўцы зноў сыгралі на сцэне перад публікай, ужо на новай пляцоўцы, і далі зразумець, што праца над «Тутэйшымі» не спыняецца, а каманда працягвае працаваць разам.
П’есу Купалы, як бачым, суправаджае даволі цярністы лёс: адразу пасля напісання і фактычна да 1990-га яна была забаронена, першая яе пастаноўка Мікалаем Пінігіным урэшце была закрыта, а другая, прэм’ера якой мела адбыцца на сцэне Купалаўскага тэатра 23 і 24 верасня, вымушана ставіцца ў новых умовах і антуражы. «У нас зусім іншыя дэкарацыі і касцюмы — тыя, што былі падрыхтаваны да прэм’еры, мы, канешне, не можам выкарыстоўваць, ніхто нам іх не дасць», — кажа рэжысёр Мікалай Пінігін.
Тым не менш у спектаклі задзейнічаны асноўны акцёрскі састаў, што звольніўся з тэатра, а ў канцы з’яўляецца і бел-чырвона-белы сцяг, і «Жыве Беларусь» — элементы, мажлівасць якіх падчас падрыхтоўкі «Тутэйшых» была галоўнай інтрыгай. На сцэне Купалаўскага тэатра сёння іх складана ўявіць, а на новай пляцоўцы ў пастаноўцы з’яўляецца відэазапіс спектакля 1990 года, дзе над сцэнай падымаецца бел-чырвона-белы сцяг, на што, як і тады, трэба адказваць воклічам «Жыве Беларусь!».
«Мне хацелася зрабіць самацытату і адаслаць да фіналу спектакля 1990 года. Тады незалежнасць яшчэ не была абвешчана і бел-чырвона-белы не быў нашым дзяржаўным сцягам, але ўсё гэта лунала ў паветры», — кажа рэжысёр.
Па словах Мікалая Пінігіна, у апошнія месяцы п’еса стала, магчыма, нават больш актуальнай: «У 90-я толькі «свядомыя» ведалі гісторыю, што гэта і навошта. Для большасці людзей незалежнасць, якая раптам на іх звалілася, была шокам, і, што з ёй рабіць, мала хто разумеў. А сёння — колькі ў нас ужо гадоў незалежнасці, якая б яна там ні была, — у Беларусі вырасла грамадзянская супольнасць, людзі шмат цікавяцца гісторыяй і літаратурай».
На сёння незразумела, як і калі пастаноўку ўжывую зможа ўбачыць шырокая публіка: купалаўцы пакуль не маюць гастрольнага пасведчання, а гэта значыць, што не могуць іграць і даваць канцэрты за грошы. «Што далей будзе, ніхто не ведае, але нашы «былыя супрацоўнікі тэатра» гэтым займаюцца», — абнадзейвае Мікалай.
-
У Гомельскім драматычным тэатры — кадравыя чысткі. Зноў праз «палітыку»
-
«Будзе смешна і балюча»: «Купалаўцы» прэзентуюць заўтра новы спектакль. У галоўных ролях — Манаеў, Белахвосцік, Гарцуева
-
«Рашэнне прыйшло звонку». Што адбываецца ў віцебскім тэатры, дзе ў спектаклі прагучала «Жыве Фландрыя!» і пачалася чарада звальненняў?
Цяпер чытаюць
Лукашэнка патлумачыў, чаму яго не відаць па серадах і суботах20
Лукашэнка патлумачыў, чаму яго не відаць па серадах і суботах
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга219219
Каментары