Купалаўцы сёння прэзентуюць новую пастаноўку. Поспех да твора прыйшоў праз 100 гадоў
Незалежная тэатральная група «Купалаўцы» сёння прэзентуе новую пастаноўку.
«Гэта быў няпросты для нас год, але скончыць яго мы хочам з іскрынкай уваччу, полымем у сэрцы і з прэм’ерай на ютубе», — гавораць акторы.
«Мы зноў звярнулі ўвагу на п’есу нямецкага драматурга Георга Бюхнэра «Войцэк». Сёння мы прапануем вам выбраныя сцэны з п’есы і спадзяёмся, што гэта стане пралогам да больш маштабнага тэатральнага праекта.
Георг Бюхнер напісаў сваю самую славутую п’есу «Войцэк» у 1837 годзе, але поспех да твора прыйшоў толькі ў ХХ стагоддзі, якое вызваліла яго абсурд, неверагодную экспрэсію і вострую экзістэнцыяльную праблематыку.
Хто такі Войцэк? Франц Войцэк — патульны, як цялё, салдат. Служыць ён аддана і пагаджаецца на ўсё: на сумнеўныя эксперыменты шарлатана-доктара, на папрокі дурнаватага капітана, на кпіны і знявагі. Абы прынесці грошай сваёй каханай Марыі і прабавіць вольную хвіліну над калыскай сына. Аднак падзеі паступова выходзяць з-пад яго і так слабога кантролю.
Рэжысёр пастаноўкі Раман Падаляка зазначае: «Тэкст п’есы даволі складаны і не адразу можна знайсці да яго ключык. Для мяне гэта гісторыя простага, маленькага чалавека, які не быў народжаны забойцам, рос слаўным дзіцёнкам. Але сістэма паступова падбіраецца і да яго ды жорстка нішчыць самае добрае, што засталося ў ягонай душы. У выніку Войцэк забівае самага блізкага чалавека. Забівае ўсё чалавечнае ў сабе».
30 снежня а 19:00 мы будзем чакаць вас на нашым ютуб-канале!
Працягласць спектакля — 50 хвілін.
Доступ да спектакля «Войцэк. Сцэны» будзе адкрыты з 19:00 да 24:00 30 снежня. Наступны паказ адбудзецца 20 студзеня 2021 года.
Нагадаем, што ў кастрычніку Купалаўцы прэзентавалі анлайн новую версію «Тутэйшых». Спектакль у інтэрнэце паглядзелі сотні тысяч чалавек.
Цяпер чытаюць
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам15
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2525
Каментары