Затрыманы 46-гадовы жыхар Маладзечанскага раёна. Мужчыну злавілі з доказамі злачынства падчас чарговай вылазкі.
Устаноўлена яго дачыненне да сямі крадзяжоў у Ждановічах і Ратамцы з 17 снежня па 27 студзеня, паведамляе прэс-служба МУС.
На «справу» затрыманы ездзіў на маршрутках, як правіла, па раніцах у буднія дні, калі гаспадары павінны былі з'ехаць на працу. Мужчына адціскаў шклопакеты, залазіў унутр і забіраў выключна ювелірныя вырабы і грошы.
Так, днём 17 снежня ў Ратамцы ён вынес з чужой кватэры каштоўнасці і некалькі гадзіннікаў на 17,6 тысяч рублёў. Ужо праз тыдзень затрыманы пабываў у Ждановічах і абакраў дом пенсіянера на 4 тысячы рублёў.
У сярэдзіне студзеня ахвярай стала яшчэ адна пажылая жыхарка Ждановічаў, у яе скралі рэчаў на 8 тысяч рублёў. Пры гэтым у двух апошніх выпадках дзверы пацярпелых былі адкрытымі.
Высветлілася, што жыхар Маладзечанскага раёна пабываў яшчэ ў чатырох дамах, аднак не знайшоў там нічога каштоўнага.
Аператыўнікам удалося канфіскаваць частку выкрадзенага, устанаўліваюцца асобы, якія маюць дачыненне да скупкі ювелірных вырабаў.
Цяпер мужчына правяраецца на дачыненне да здзяйснення аналагічных злачынстваў. Раней ён прыцягваўся да крымінальнай адказнасці за крадзяжы і нядаўна вызваліўся з месцаў пазбаўлення волі ў Расіі, дзе адбываў пакаранне за крадзяжы.
Каментары