Эбі Блум — выкладчыца ў Школе грамадскага здароўя Сіднэйскага ўніверсітэта і ў Сіднэйскім тэхналагічным універсітэце. У сваім новым артыкуле для брытанскага выдання «Гардыян» спадарыня Блум піша: з кожным днём чалавецтва збірае ўсё больш інфармацыі пра кавід, і гэта ўрэшце дапаможа нам перамагчы пандэмію.
Пандэмія кавіду была выпадкам, калі палітыкам і медыкам даводзілася прымаць меры, не валодаючы дастатковай інфармацыяй для гэтага. Прыклад гэтага — як кіраўнік амерыканскай санітарнай службы Энтані Фаўчы казаў у сакавіку 2020 года: «Няма сэнсу хадзіць у масцы». Навукоўцы абверглі гэты тэзіс, бо пачалі лепш разумець вірус і механізмы яго перадачы.
Эбі Блум тлумачыць, што крызісныя сітуацыі патрабуюць тэрміновых рашэнняў, але цяпер нам для гэтага проста не хапае інфармацыі. Большая частка супрацькавідных вакцын, што распаўсюджваюцца зараз у свеце, знаходзяцца на трэцяй фазе выпрабаванняў — то-бок колькасць прышчэпленых людзей вымяраецца тысячамі. Пакуль што вакцынацыя толькі пачынаецца, і таму да вакцын ёсць шмат пытанняў. Напрыклад, невядома, наколькі вакцыны будуць дзейнічаць супраць новых штамаў кавіду, ці будзе чалавек пераносчыкам кавіду пасля вакцынацыі, як канкрэтна вакцыны будуць дапамагаць арганізму змагацца з хваробай.
Але ўжо адназначна, што за 10 месяцаў працы над вакцынамі навукоўцы дасягнулі цудоўных вынікаў, і новая інфармацыя пра кавід збіраецца з неймавернай хуткасцю. Таму наконт вакцынацыі Эбі Блум упэўненая: «Трэба давяраць медыцыне, вакцынавацца варта».
Цяпер чытаюць
«Пенсіянерам дзеці перашкаджаюць!» У Брэсце не першы месяц ідуць спрэчкі наконт месца для будаўніцтва дзіцячага сада9
Каментары