«Крыміналка» для пратэстоўцаў і асаблівыя спісы. Генпракуратура распавяла аб папраўках у «антыэкстрэмісцкі» закон

Пасля нарады ў Аляксандра Лукашэнкі па пытаннях карэкціроўкі заканадаўства, у Генпракуратуры распавялі аб прапановах па ўзмацненні адказнасці за экстрэмісцкую дзейнасць. У новай рэдакцыі закона Рэспублікі Беларусь «Аб супрацьдзеянні экстрэмізму» органам унутраных спраў і дзяржаўнай бяспекі прадастаўлены паўнамоцтвы па прызнанні груп грамадзян экстрэмісцкімі фарміраваннямі і забароне іх дзейнасці, піша Tut.by.

Згодна з праектам пракурор, органы дзяржбяспекі і ўнутраных спраў атрымаюць права пры выяўленні прыкмет экстрэмісцкіх дзеянняў выносіць прадпісанні заснавальнікам і кіраўнікам арганізацый, індывідуальным прадпрымальнікам пры адсутнасці падстаў для прыцягнення іх да крымінальнай адказнасці. Невыкананне такіх патрабаванняў, а таксама паўторнае цягам года вынясенне прадпісання — падставы для ліквідацыі арганізацыі, спынення дзейнасці ІП. Пры гэтым справы аб прызнанні арганізацыі экстрэмісцкай і яе ліквідацыі будуць разглядацца судом першай інстанцыі ў скарочаныя тэрміны: да аднаго месяца з дня прыняцця заявы.

Для заснавальнікаў і ўдзельнікаў экстрэмісцкіх арганізацый прадугледжана забарона на працягу 5 гадоў засноўваць новыя арганізацыі і СМІ.

МУС будзе весці пералікі арганізацый, фарміраванняў, індывідуальных прадпрымальнікаў і грамадзян, якія маюць дачыненне да экстрэмісцкай дзейнасці. Грамадзяне, асуджаныя за злачынствы, звязаныя з экстрэмізмам, будуць уключаныя ў гэты пералік і пазбаўленыя права на занятак асобнымі відамі дзейнасці, напрыклад, спалучанай з абаротам наркатычных сродкаў, зброі і боепрыпасаў, педагагічнай, выдавецкай. Іх фінансавыя аперацыі будуць падлягаць асабліваму кантролю.

Замежным грамадзянам і асобам без грамадзянства, якія трапілі ў такі пералік, будзе забаронены ўезд на тэрыторыю краіны, а для грамадзян Беларусі гэтая акалічнасць стане падставай для страты набытага грамадзянства.

Пашырана паняцце «экстрэмісцкія матэрыялы»: да іх будуць аднесены не толькі інфармацыйная прадукцыя, але і сімволіка, атрыбутыка, прызначаныя для экстрэмісцкай дзейнасці і яе прапаганды.

У законапраекце аб унясенні змяненняў у закон Рэспублікі Беларусь «Аб сродках масавай інфармацыі» прадугледжана права Генеральнага пракурора, пракурораў абласцей, горада Мінска абмежаваць доступ да інтэрнэт-рэсурсу і сеткавага выдання праз звесткі, накіраваныя на прапаганду вайны, экстрэмісцкай дзейнасці або тыя, што змяшчаюць заклікі да такой дзейнасці, а таксама іншая інфармацыя, распаўсюджванне якой здольна нанесці шкоду нацыянальным інтарэсам Беларусі.

У Працоўным кодэксе будзе ўведзеная безумоўная забарона на вылучэнне палітычных патрабаванняў пры правядзенні забастоўкі, а адпаведнае рашэнне суда падлягае неадкладнаму выкананню.

Пашыраныя падставы для прыцягнення да крымінальнай адказнасці за экстрэмісцкія праявы. Асабліва за тыя з іх, якія суправаджаюцца гвалтам або пагрозай яго прымянення да супрацоўнікаў АУС, службовых асоб пры выкананні імі службовых абавязкаў, а таксама «іншых асоб, якія выконваюць грамадскі абавязак», што робіць гэтае кола асабліва шырокім.

Прадугледжана ўзмацненне адказнасці за супраціў супрацоўнікам АУС і «асобам, якія ахоўваюць грамадскі парадак», прымяненне да іх гвалту.

Акрамя таго, будзе ўведзеная адказнасць за публічную абразу блізкіх прадстаўніка ўлады.

Прапанавана караць у крымінальным парадку за незаконны збор альбо распаўсюд інфармацыі аб прыватным жыцці або персанальных даных грамадзян, а таксама ўвесці павышаную адказнасць за такія дзеянні ў дачыненні да асобы або яго блізкіх у сувязі з ажыццяўленнем службовай дзейнасці або выкананнем грамадскага абавязку.

Мяркуецца таксама крыміналізаваць неаднаразовае парушэнне парадку арганізацыі і правядзення масавых мерапрыемстваў.

Упершыню ўводзіцца адказнасць за такія праявы экстрэмізму, як удзел у экстрэмісцкім фарміраванні, фінансаванне экстрэмісцкай дзейнасці, вярбоўка, навучанне і падрыхтоўка асобы для ўдзелу ў названай дзейнасці.

Прапанавана ўсталяваць крымінальную адказнасць за распаўсюджванне заведама лжывых звестак аб палітычным, эканамічным, сацыяльным, ваенным ці міжнародным становішчы Беларусі, прававым становішчы грамадзян, дзейнасці органаў дзяржаўнай улады і кіравання, што дыскрэдытуе Беларусь, калі такія дзеянні здзейсненыя ў любым публічным выступе, у тым ліку СМІ і пляцоўкі ў сетцы Інтэрнэт.

У праекце таксама ідзе гаворка аб крымінальнай адказнасці за заклікі да парушэння тэрытарыяльнай цэласнасці краіны.

• 0
• 0
• 0
• 0
• 0
• 0
• 0
• 0