Памятаеце дзяўчыну, якую ўжо пяць разоў затрымлівалі па адміністратыўцы? Сёння па яе прыйшлі шосты раз
Не так даўно мы пісалі пра 22-гадовую Кацярыну Атрахімёнак, якая паспела адбыць 55 сутак пасля выбараў па адміністрацыйных артыкулах. Сёння Кацярына зноў з'явілася ў спісах затрыманых.
Як паведаміла «Нашай Ніве» Марына Атрахімёнак, маці Кацярыны, прыблізна ў 16.00 да дзяўчыны прыйшлі ў інтэрнат і забралі адтуль з фармулёўкай «для прафілактычнай размовы».
«Мне патэлефанавала яе сяброўка, Каця тым часам збірала рэчы. На ўсякі выпадак, калі не вернецца. Усё, што нам вядома, — яе забралі на прафілактычную размову. Але не веру, што дачку адпусцяць», — кажа Марына.
Раней па месцы жыхарства Каці ўжо прыходзілі: перад Усебеларускім народным сходам. Забралі ў РУУС з абяцаннем «толькі на гадзіну, пагутарыць», але ў выніку дзяўчыну асудзілі на 15 сутак нібыта за супраціў міліцыянерам. Перад УНС ізалявалі многіх актыўных беларусаў. Цяперашнія прафілактычныя размовы некаторыя звязваюць з падрыхтоўкай да Дня Волі.
Мы будзем сачыць за лёсам Каці.
Каментары