Спявачка і акцёрка Ганна Хітрык прэзентавала новы альбом. Гэта адбылося праз 4 гады пасля эміграцыі артысткі ў Ізраіль.
Апошні дагэтуль альбом быў запісаны яшчэ ў Беларусі.
У 2017 годзе Ганна Хітрык з’ехала ў Ізраіль. Чатыры гады яна не выступала на сцэне. Аднак у кастрычніку 2021 году калектыў «Ань Хитрик band» прадставіў у Тэль-Авіве альбом «Тень», паведамляюць naviny.by.
Альбом даступны на сайце гурта, а неўзабаве з’явіцца на розных музычных платформах. Прэзентацыі адбудуцца таксама ў Хайфе і Раанане.
Хітрык адзначыла, што калі яе запытваюць пра Беларусь, то першая карцінка, якая ўсплывае перад вачыма, — забітыя, пакалечаныя, збітыя. Яна цалкам падтрымлівае рашэнне вядучых акцёраў Купалаўскага пайсці з тэатра ў жніўні 2020 года.
«Думаю, я б была ў першых шэрагах тых, хто пайшоў з Купалаўскага тэатра. У той момант іграць што б там ні было на сцэне азначала скакаць на касцях. Гэта антычалавечна — рабіць выгляд, што нічога не адбываецца, калі людзей знішчаюць, збіваюць. Я лічу, што тое, што засталося цяпер ад Нацыянальнага тэатра імя Янкі Купалы — гэта будынак, які чакае сваіх акцёраў. Яны вернуцца туды абавязкова, я ў гэтым упэўнена. Пакуль я ўспрымаю тое, што адбываецца там, так: у памяшканне прыйшлі нейкія людзі і граюць у тэатр».
Каментары