Фіны хочуць зрабіць заробкі празрыстымі, каб калегі ведалі, хто колькі зарабляе. Вось навошта гэта
У Фінляндыі рыхтуецца законапраект, які дазволіць любому чалавеку пацікавіцца заробкам калегі. Навошта гэта, піша Reuters.
У 2020 годзе, згодна з вынікамі даследавання Арганізацыі эканамічнага супрацоўніцтва і развіцця, фінскія жанчыны зарабілі на 17,2% менш за фінскіх мужчын.
Па выніках гэтага даследавання Фінляндыя апынулася на 37-м месцы па роўнасці аплаты працы, нягледзячы на тое, што пытанне гендарнай роўнасці ўжо некалькі дзесяцігоддзяў застаецца на парадку дня ў Фінляндыі.
Суседкі значна абагналі краіну — Нарвегія апынулася на 8-м месцы, Данія на 9-м, а Швецыя на 12-м.
Прычыны такога нярадаснага раскладу традыцыйныя: падзел рынку працы на мужчынскія і жаночыя прафесіі, таты менш сядзяць у дэкрэце, жанчын не павышаюць па кар’ернай лесвіцы так лёгка, як мужчын.
«Было нямала выпадкаў, калі я выяўляла, што мужчыну за тую самую працу заплацілі больш, чым мне», — прызнаецца Мэр’я Махка, раней журналістка, а цяпер інвестарка і блогерка, якая ўжо трэці год разварушвае грамадскую дыскусію пра празрыстасць заробкаў. Сёлета яна пазначае ў сацыяльных сетках, што ў 2020 годзе атрымала 56 тысяч даляраў даходу.
Калі гэты законапраект распрацоўваўся ў мінулым лістападзе, галоўная фінская арганізацыя працадаўцаў, Канфедэрацыя фінскай прамысловасці, выйшла з працоўнай групы на знак пратэсту.
Варта глыбей даследаваць праблему розніцы ў аплаце працы, а вывешваць інфармацыю пра заробак можна толькі са згоды чалавека, перакананыя працадаўцы. Інфармацыя пра заробак кожнага толькі пагоршыць атмасферу ў працоўным калектыве, лічаць яны.
Прадстаўнікі прафсаюзаў, наадварот, лічаць, што тэма няроўнасці ўжо добра даследаваная, і прыйшоў час дзейнічаць.
«Каб выраўняць заробкі, трэба памяняць стаўленне людзей да гэтай праблемы, а каб змянілася нешта ў агульнай культуры — трэба спачатку змяніць закон», — дадае Катарына Муро, дырэктарка Канфедэрацыі прафсаюзных работнікаў і менеджараў.
Скласці такі законапраект — няпростая справа. Але члены працоўнай групы спадзяюцца, што ён будзе прыняты яшчэ да наступных парламенцкіх выбараў у 2023 годзе.
У Парагваі рэстаўратара і яго дачку забілі з-за скрыпак Страдывары
Ва Украіне знішчылі паўмільёна доз заходняй вакцыны — людзі не хочуць прышчапляцца
Цяпер чытаюць
Хлопца, які ў Лебедзевай хаяў Еўропу, асудзілі за ўдзел у пратэстах і ўхіленне ад войска6
Каментары