Расійскі кансультатыўны савет па замежных інвестыцыях (КСЗІ) звярнуўся да першага віцэ-прэм'ера Расіі Андрэя Белавусава з просьбай дапамагчы ў вырашэнні праблем аўтаперавозак з Еўропы ў Расію, якія ўзніклі на фоне міграцыйнага крызісу. Транспартны калапс на кантрольна-прапускным пункце «Баброўнікі», дзе ўтварыўся 25-кіламетровы затор з грузавікоў, пагражае расійскім спажыўцам перабоямі з пастаўкамі тавараў, у тым ліку першай неабходнасці. З затрымкамі сутыкнуліся буйныя рытэйлеры, а пастаўшчыкі папярэджваюць пра рызыку росту цэн. Відавочнага лагістычнага рашэння ўдзельнікі рынку і эксперты не бачаць, разлічваючы на палітычнае ўрэгуляванне пытання, піша «Камерсант».
У распараджэнні «Камерсанта» аказаўся ліст ад 18 лістапада, у якім КСЗІ (у яго ўваходзяць, напрыклад, Danone, Mars, Metro, PepsiCo, Sanofi, Coca-Cola, Unilever) папярэдзіў першага віцэ-прэм'ера РФ Андрэя Белавусава пра рызыкі, якія ўзніклі ў сувязі з міграцыйным крызісам на мяжы ЕС і Беларусі. Праз гэтую мяжу праходзіць каля 10% расійскага імпарту ў натуральным выражэнні, уключаючы харчовыя і нехарчовыя тавары, у тым ліку першай неабходнасці, медвырабы, сыравіну, кампаненты, упакоўку і абсталяванне, гаворыцца ў лісце. Больш за 90% паставак прыпадае на аўтамабільны транспарт.
На КПП «Баброўнікі» на мяжы з Польшчай утварыліся чэргі з грузавікоў даўжынёй больш за 25 км, час пераходу павялічыўся да 80 гадзін, тады як дзень прастою адной машыны абыходзіцца мінімум €500, гаворыцца ў лісце.
Па дадзеных КСЗІ, на альтэрнатыўных аб'язных маршрутах праз Латвію або Літву таксама пачалі ўтварацца заторы, прычым у нармальных умовах праезд па гэтых дарогах павялічвае выдаткі мінімум на €300 на адну машыну. Выкарыстанне іншага транспарту, адзначаюць у КСЗІ, спалучана з істотным павелічэннем кошту дастаўкі.
«Захаванне сітуацыі, якая склалася, можа істотным чынам паўплываць на ланцугі паставак і даступнасць тавараў для насельніцтва, асабліва, улічваючы павелічэнне грузаабароту і павышаны попыт на прадукцыю напярэдадні навагодніх святаў»,— папярэджваюць у КСЗІ.
Бізнэс просіць Андрэя Белавусава пасадзейнічаць забеспячэнню міжведамаснай каардынацыі і падрыхтоўцы да павелічэння грузапатокаў праз мяжу РФ з Латвіяй.
У прэс-службе ўрада заявілі «Камерсанту», што ліст пакуль не паступаў. У Мінтрансе і Мінпрамгандлю каментарыяў не далі.
Крыніца ў буйной гандлёвай сетцы кажа, што ў кампаніі на КПП «Баброўнікі» стаіць некалькі аўтамабіляў. Пакуль сітуацыя не крытычная, але прагназаваць далейшае развіццё і наступствы складана, адзначае ён. З затрымкамі ў праходжанні грузаў сутыкнулася сетка «Лента», пацвердзіў яе прадстаўнік, адмовіўшыся ўдакладніць дэталі.
Дырэктар па прававых пытаннях і карпаратыўных адносінах AB InBev Efes (BUD, Stella Artois, Corona Extra) Араз Дурдыеў кажа, што сітуацыя ўжо выклікала недахоп рухомага складу на гэтым кірунку, а ў перспектыве можа пацягнуць дэфіцыт прадукцыі, перабоі з пастаўкамі і рост канчатковай цаны для спажыўца. У PepsiCo (брэнды Pepsi, Lay's, J7, «Домік в деревне» і інш.) адзначаюць, што сітуацыя з праходжаннем мяжы працягвае пагаршацца, растуць заторы, што пагражае разрывамі ў ланцугах паставак. Выканаўчы дырэктар «Русхарчсаюза» Дзмітрый Вострыкаў дадае, што складанасці з лагістыкай негатыўна адбіваюцца на рэнтабельнасці пастаўшчыкоў з-за прастою аўтатранспарту.
Кіраўнік фірмы ГК «Саўтрансаўта» Уладзімір Цян кажа, што само па сабе перанакіраванне грузаў на іншы КПП не вырашыць праблему: з улікам дзеючых мер кантролю і магчымасцяў інфраструктуры прапускная здольнасць застаецца абмежаванай.
Па словах крыніцы на рынку, бізнэс у дадзеным выпадку спадзяецца «на палітычнае рашэнне пытання».
Між тым прэм'ер Польшчы Матэвуш Маравецкі 21 лістапада папярэдзіў, што краіна гатовая да поўнага закрыцця мяжы, транзіту і гандлю з Беларуссю. Выканаўчы дырэктар Нацыянальнага саюза экспертаў у сферы транспарту і лагістыкі Вольга Фядоткіна кажа, што з улікам максімальна шырокага пераліку тавараў, якія перавозяцца, шкоду ад магчымага поўнага закрыцця мяжы для расійскіх спажыўцоў і бізнесу «нават уявіць складана».
Цяпер чытаюць
Статкевіч расказаў, як выжываў у зняволенні. І чым займаецца цяпер1
Каментары