Беларускі арнамент і партрэт Быкава. Бізнэс-цэнтр з незвычайным дызайнам адкрыўся ў Баранавічах ФОТЫ
Інтэр'ер гістарычнага будынка побач са Старым паркам, які апошнія гады займала мясцовая тэлекампанія, атрымаў новае жыццё, піша Intex-press.by.
Звонку стары будынак на Камсамольскай, у якім на працягу многіх гадоў размяшчалася Баранавіцкая тэлекампанія, выглядае звыкла. Але ўнутры ён змяніўся да непазнавальнасці: хол сустракае яркімі элементамі беларускага нацыянальнага арнамента на сценах, паверхам вышэй размясціліся вялікія пано з партрэтамі класікаў беларускай літаратуры — Васіля Быкава, Янкі Купалы, Якуба Коласа, Элізы Ажэшкі.
Ідэя пераплесці беларускую класіку з сучасным дызайнам у інтэр'еры прыйшла ўладальніку баранавіцкага бізнэс-інкубатара Руслану Асадулаеву, які арандаваў гэты будынак пад свой новы навучальны бізнес-праект.
«Дзіўна, што ў нас ніхто не афармляе інтэр'еры ў падобным стылі, бо нам ёсць чым ганарыцца! Асноўнай задачай было сумясціць сучаснасць і багатае мінулае нацыянальнай беларускай культуры, — распавядае дырэктар бізнэс-цэнтра. — Мы ўзгаднілі праект і стварылі гэты інтэр'ер разам з дызайнерам. Па-мойму, у нас атрымалася!»
У абноўленым памяшканні, па словах Руслана Асадулаева, размешчаныя навучальныя класы, у якіх будуць праходзіць розныя майстар-класы для будучых прадпрымальнікаў горада.
Гістарычны будынак на вуліцы Камсамольскай быў пабудаваны ў 1938 годзе, у ім размяшчалася Баранавіцкая радыёстанцыя. Архітэктар праекта — варшаўскі спецыяліст Тадэвуш Лобас. Гэта ўнікальны для горада будынак у стылі функцыяналізму. Пасля вайны абсталяванне радыёстанцыі было перададзенае ў Варшаву для ўзнаўлення радыёвяшчання.
Да пачатку 1990-х у гэтым будынку размяшчалася радыёстанцыя пастаноўкі перашкод — «глушылка» заходніх радыёперадач, а пасля распаду СССР — тэлекампанія «Intex».
Як беларусы ў Вільні адзначылі Дзень Волі ШМАТ ФОТА4
Як беларусы ў Вільні адзначылі Дзень Волі ШМАТ ФОТА
Часам нечаканая гісторыя беларускіх гімнаў: «Мы выйдзем шчыльнымі радамі», «Пагоня», «Жыве Беларусь», «Радзіма мая дарагая», «Магутны Божа» (з ВІДЭА)1111
Каментары