Чарга з фураў на польска-беларускай мяжы расцягнулася на 37 кіламетраў
Паводле звестак польскіх памежнікаў на 28 сакавіка, кіроўцам даводзіцца чакаць па 78 гадзін на мяжы, каб аформіць уезд у Беларусь. Ужо каля двух тыдняў кожная змена ў Баброўніках афармляе менш фураў, чым звычайна, і гэта дадаткова адбіваецца на даўжыні чаргі, піша mostmedia.io.
За апошнюю дванаццацігадзінную змену памежнікі прапусцілі праз гэты памежны пераход 141 машыну з грузам. Стандарт жа для гэтага пераходу складае ад 250 да 300 грузавікоў за змену.
Польскія службы тлумачаць, што такая колькасць грузавікоў, якія падлягаюць праверцы, звязаная з тым, што праверкі займаюць больш часу з-за эканамічных санкцый Еўрасаюза і забароны на ўвоз некаторых тавараў у Расію пасля пачатку яе агрэсіі супраць Украіны.
Польская мытная служба не толькі правярае дакументы, але і фізічна даглядае грузавікі, якія ідуць на ўсход, каб пераканацца, што там сапраўды знаходзяцца тавары, заяўленыя ў дакументах. Для гэтага таксама выкарыстоўваюцца рэнтгенаўскія сканеры.
На іншым польскім памежным пераходзе ў Кукурыках час чакання ўезду для грузавога транспарту меншы, але таксама значны — 40 гадзін. Яшчэ нядаўна там праходзілі акцыі пратэсту.
Увогуле ж доўгія чэргі з грузавікоў у Баброўніках сталі ўтварацца з 9 лістапада 2021 года, калі з-за сітуацыі з мігрантамі на нявызначаны тэрмін быў прыпынены рух на суседнім пункце пропуску ў Кузніцы.
Каментары