Ціханоўская «перадала Вашынгтону доказы ўдзелу рэжыму Лукашэнкі ў вайне супраць Украіны»
Знаходзячыся ў ЗША, Святлана Ціханоўская дала інтэрв'ю мясцовым сродкам масавай інфармацыі, «Голасу Амерыкі» і CNN, у якіх расказала, пра што сустракалася з высокапастаўленымі амерыканскімі чыноўнікамі і парламентарыямі.
Узмацненне санкцый і далейшая ізаляцыя рэжыму Лукашэнкі ў Беларусі, большая дапамога грамадзянскай супольнасці і СМІ, падтрымка медыкаў і беларускіх добраахвотнікаў, якія ваююць на баку ўкраінскага народа супраць расійскіх войскаў — да гэтага ў Вашынгтоне амерыканскіх палітыкаў заклікала лідар беларускай апазіцыі Святлана Ціханоўская.
У эксклюзіўным інтэрв'ю Рускай службе «Голасу Амерыкі» Ціханоўская расказала, што прыехала на цырымонію пахавання дзяржсакратара ЗША Мадлен Олбрайт, з якой сустракалася пры яе жыцці, і правяла сустрэчы з некалькімі сенатарамі і членамі Палаты прадстаўнікоў, уключаючы спікерку Нэнсі Пелосі, а таксама — з прадстаўнікамі Рады нацыянальнай бяспекі ЗША.
«Я дала новую інфармацыю па Беларусі і распавяла ім пра нашу стратэгію, як атрымаць перамогу над Лукашэнкам; наша стратэгія грунтуецца на знясіленні рэжыму Лукашэнкі», — сказала яна.
Як сцвярджае Ціханоўская, яна прапанавала прадстаўнікам амерыканскага істэблішменту ўвесці больш моцныя санкцыі супраць рэжыму Лукашэнкі.
Яны павінны быць такімі ж магутнымі, як і санкцыі супраць Расіі, але адрознымі па сваёй структуры.
На яе думку, рэжым Лукашэнкі павінен быць цалкам выдалены з усіх міжнародных арганізацый, каб яго голас не гучаў на міжнароднай арэне.
Таксама, паводле паведамлення CNN,
Ціханоўская расказала журналістам, што падчас сустрэчы з высокапастаўленымі амерыканскімі чыноўнікамі яна перадала дакументы з доказамі ўдзелу Лукашэнкі ў вайне супраць Украіны, а таксама пералік кампаній і краін, якія дапамаглі абысці санкцыі.
Па яе словах, гэта «масавыя доказы запуску ракет з нашай тэрыторыі, перамяшчэння расійскай тэхнікі па тэрыторыі Беларусі».
«Гэта ўнутраная інфармацыя пра нейкія распараджэнні аб размяшчэнні на нашай тэрыторыі рознай расійскай вайсковай тэхнікі», — патлумачыла Ціханоўская CNN.
«Так, людзі збіралі гэтую інфармацыю на працягу ўсяго перыяду вайны. Яна добра дакументаваная, і мы перадалі гэтыя доказы ўраду».
Гаворачы пра сустрэчу з прэзідэнтам Украіны Уладзімірам Зяленскім у інтэрв'ю «Голасу Амерыкі», Ціханоўская сказала, што разумее, чаму яна так і не адбылася. Зяленскі не хацеў сустракацца з ёй да пачатку ваеннага канфлікту, каб не справакаваць Лукашэнку даць тэрыторыю сваёй краіны для ўварвання расійскіх войскаў ва Украіну, што ў выніку і адбылося.
З пачаткам канфлікту, сказала Ціханоўская, апазіцыя Беларусі ўзмацніла сваё супрацоўніцтва з украінскай уладай і грамадзянскай супольнасцю і плануе адкрыць у Кіеве прадстаўніцтва.
Як кажа лідар беларускай апазіцыі, падчас сустрэч у Вашынгтоне яна заклікала амерыканцаў аказваць вялікую падтрымку Украіне.
«Я падтрымліваю Украіну, і калі ўкраінцы просяць пра пэўны рыштунак, вайсковую дапамогу, то трэба яе даць, таму што Украіна змагаецца не толькі за сваю дзяржаву.
Яна змагаецца за дэмакратычныя каштоўнасці, за незалежнасць, а беларусы змагаюцца побач з імі за сваю незалежнасць таксама».
-
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі
-
МЗС Літвы не будзе разглядаць прапанову мясцовага дэпутата аб ануляванні акрэдытацыі офіса Ціханоўскай
-
Жанчыну-пульманолага з 30-гадовым стажам адправілі ў калонію па трох палітычных артыкулах
Цяпер чытаюць
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі3
Каментары