ВПС ЗША прадставілі найноўшы ядзерны бамбардзіроўшчык-невідзімку B-21, што паступова заменіць самалёты B-1 і B-2, якія знаходзяцца на ўзбраенні краіны яшчэ з часоў халоднай вайны, піша «Бі-бі-сі».
Прэзентацыя прайшла ў пятніцу на заводзе вытворцы Northrop Grumman у Каліфорніі.
B-21 — першы бамбардзіроўшчык, пабудаваны ў ЗША за апошнія 30 гадоў. Яго кошт складае амаль 700 млн даляраў.
Ён здольны несці як ядзерныя, так і звычайныя боепрыпасы.
Іншыя магчымасці пакуль не раскрываюцца.
Міністр абароны ЗША Лойд Осцін заявіў напярэдадні, што прэзентацыя B-21 сведчыць пра сталыя перавагі ЗША ў тэхналогіях і інавацыях.
Ён патлумачыў, што стварэнне бамбардзіроўшчыка — гэта вынік 50-гадовых даследаванняў і дасягненняў у самых розных галінах, у тым ліку ў тых, якім іншыя краіны дагэтуль надавалі мала значэння.
Вытворцы адзначаюць, што ў стварэнні выкарыстоўваюцца прарыўныя тэхналогіі і новыя матэрыялы, інфармацыя пра якія пакуль засакрэчаная.
Паведамляецца толькі, што В-21 аснашчаны тэхналогіямі-невідзімкамі наступнага пакалення.
«Нават самыя дасканалыя сістэмы СПА не змогуць выявіць B-21 у небе», — сказаў міністр абароны ЗША.
Канструкцыя самалёта прадугледжвае, што ён зможа несці ўзбраенні, якія яшчэ нават не вынайдзены. Амерыканскія інжынеры называюць гэта «архітэктурнай сістэмай адкрытага тыпу».
У ВПС ЗША заяўляюць, што ён можа функцыянаваць як беспілотнік, але палёты без экіпажа пакуль не абмяркоўваліся і не прадугледжаныя.
Чакаецца, што першы палёт B-21 адбудзецца ў 2023 годзе.
У цяперашні час у вытворчасці знаходзіцца шэсць самалётаў. ВПС ЗША плануюць набыць не менш за 100 адзінак.
Цяпер чытаюць
Гродзенскага падлетка адправілі ў школу ў Літву — ён вывучыў літоўскую і цяпер перакладае ў Еўрапарламенце. Перакладаў ён і Ціханоўскіх17
Каментары