Падатак на прафесійны даход для рамеснікаў можа скласці 6 рублёў у месяц
У Беларусі падрыхтаваны законапраект, які дазволіць рамеснікам прымяняць падатак на прафесійны даход. Пра гэта распавяла начальніца аддзела падаткаабкладання індывідуальных прадпрымальнікаў МПЗ Таццяна Путрык падчас вебінара «Падатак на прафдаход» 14 снежня, піша Office Life.
Па словах прадстаўніцы МПЗ, фізасоба, якая займаецца рамеснай дзейнасцю, з 2023 года будзе мець права перайсці на прымяненне падатку на прафдаход. Каб даць магчымасць рамеснікам прымяняць такі падатак, з 1 студзеня 2023 года рамесны збор будзе выплачвацца штомесяц, і яго сума складзе 6 рублёў.
Тыя фізічныя асобы, якія вядуць рамесную дзейнасць і захочуць перайсці на прымяненне падатку на прафдаход, напрыклад, у лютым 2023 года, збор павінны выплаціць да пачатку рамеснай дзейнасці за адпаведны месяц, у якім ажыццёўлены пераход. Ім рамесны збор будзе пералічаны.
Путрык падкрэсліла, што прапанова аб штомесячнай выплаце рамеснага збору — гэта законапраект, і калі ён будзе прыняты, то пачне дзейнічаць з 1 студзеня 2023 года. А дзеючае заканадаўства абавязвае ў 2022 годзе фізічных асоб-рамеснікаў выплаціць збор за 2023 год не пазней за 28 снежня ў суме 62 рублі.
Калі законапраект будзе прыняты ў такой рэдакцыі, то з 1 студзеня 2023 года ўсім фізічным асобам-рамеснікам, якія заплацілі збор у снежні 2022 года, правядуць пераразлік з памесячнай выплатай. А ў выпадку, калі фізасоба пяройдзе на прымяненне падатку на прафдаход, пераразлік зробяць і за канкрэтны месяц, у якім будзе ажыццёўлены такі пераход.
З 1 студзеня ў Беларусі падатак на прафесійны даход у некаторых выпадках будзе абавязковым, а ў іншых — добраахвотным. У пастанове Саўміна № 851 «Аб пераліку відаў дзейнасці» вызначана, хто з самазанятых можа стаць плацельшчыкам падатку на прафесійны даход. У пералік не трапілі прафесійныя паслугі бухгалтараў, юрыстаў, іншыя. Амаль усе віды дзейнасці, па якіх ІП могуць супрацоўнічаць з юрасобамі, аказаліся па-за сферай прымянення НПД.
Каментары