Вікторыя Нуланд: ЗША падтрымліваюць удары ўкраінцаў па расійскіх вайсковых аб'ектах у Крыме
Незалежна ад таго, калі і як скончыцца цяперашняя расійска-ўкраінская вайна, неабходна забяспечыць гарантыі для таго, каб Расія не развязала яе зноў, заявіла намеснік дзяржсакратара ЗША па палітычных справах Вікторыя Нуланд.
Верыць словам Пуціна або таго, хто стане на чале Расіі пасля яго, нельга будзе нават пасля заканчэння вайны, мяркуе яна.
«Мы ні ў якім разе не павінны верыць, пакуль Уладзімір Пуцін ці хтосьці тыпу яго знаходзіцца ва ўладзе, што гэта сапраўды скончана. Нават калі будзе дасягнуты справядлівы мір, усё роўна спатрэбіцца доўгатэрміновы план і выбудоўванне ўкраінскай арміі будучыні, якая змагла б адбіць у Пуціна ўсякую ахвоту задумаць што-небудзь у далейшым», — сказала Вікторыя Нуланд.
У ходзе анлайн-дыскусіі ў вашынгтонскім Фондзе Карнегі Нуланд сказала, што ЗША глядзяць не толькі на тое, якія ўзбраенні можна адправіць на поле бою ва Украіне проста цяпер, але таксама на тыя, якія спатрэбяцца для надзейнага стрымлівання Расіі ў далейшым.
Адказваючы на пытанне вядучага, ці не асцерагаюцца ў Вашынгтоне перасекчы якія-небудзь праведзеныя Крамлём «чырвоныя лініі», аказваючы падтрымку Украіне, у прыватнасці, калі ў Кіеве вырашаць вярнуць ваенным шляхам захоплены Расіяй у 2014 годзе Крым, намеснік кіраўніка амерыканскай дыпламатыі сказала, што ЗША ніколі не прызнавалі Крым расійскім і Украіне належыць уся яе тэрыторыя ў міжнародна прызнаных межах.
«Я не буду будаваць здагадак, дзе ўкраінцы вырашаць ваяваць. Ці якім чынам яны вырашаць дзейнічаць у дачыненні да Крыма ў кароткатэрміновай, сярэднетэрміновай і доўгатэрміновай перспектывах. Мы лічым Крым Украінай», — сказала Нуланд.
Са слоў Нуланд, пасля акупацыі Крыма Расія ператварыла паўвыспу ў свой вайсковы плацдарм, размясціўшы там баявыя магутнасці, склады ўзбраенняў і камандныя цэнтры, якія пагражаюць і будуць пагражаць бяспецы Украіны да той пары, пакуль там знаходзяцца.
Гэтыя вайсковыя аб'екты, якія Расія размясціла ў Крыме, ЗША разглядаюць як легітымныя цэлі і падтрымліваюць нанясенне ўкраінскай арміяй удараў па іх, сказала намеснік дзяржсакратара.
«Гэта законныя цэлі. Украіна наносіць па іх ўдары. І мы падтрымліваем гэта. Украіна ніколі не будзе ў бяспецы, пакуль Крым, як мінімум, не дэмілітарызаваны», — мяркуе Нуланд.
Пры гэтым Нуланд дадала, што перш чым падысці да пытання аб Крыме, украінскім вайскоўцам неабходна яшчэ вярнуць значныя тэрыторыі. «І менавіта на гэтым яны цяпер сканцэнтраваныя», — сказала яна.
Цяпер чытаюць
«Усё так ці інакш будзе вырашацца на полі бою». Чым будзе займацца новая кіраўніца Місіі дэмакратычнай Беларусі ва Украіне?14
Каментары