«Настроены выжыць». Зняволеная расказала пра сустрэчу з сынам Бабарыкі на Валадарцы
Эдуарда Бабарыку ўтрымліваюць у няволі без суда рэкордныя 2,5 года. Яго схапілі 18 чэрвеня 2020 года, і ад той пары звестак пра палітвязня вобмаль. На Валадарцы з ім выпадкова перасеклася палітзняволеная Валерыя Чарнаморцава, якой удалося збегчы з Беларусі пасля таго, як ёй прызначылі 2,5 года «хатняй хіміі».
На Валадарцы арганізатарку вандровак і гісторыка Чарнаморцаву ўтрымлівалі, пакуль вялося следства і разглядалі яе справу ў судзе: з кастрычніка 2022 па 16 студзеня 2023 года. Праваабаронцы прызналі Валерыю Чарнаморцаву палітвязнем.
Эдуарда Бабарыку яна бачыла ў снежні ля кабінетаў для сустрэч зняволеных з адвакатамі ці следчымі.
«Пакуль стаялі ўдалечыні ахоўнікі, я паспела сказаць яму «Жыве» і паказаць кулак. Маўляў, трымайся», — расказвае Чарнаморцава пра сустрэчу.
Па яе словах, Эдуард выглядае «даволі добра» і робіць уражанне чалавека, які «настроены выжыць у няволі».
«Калі чалавек хоча выжыць, то ён трымае сябе ў добрай фізічнай форме. Робіць практыкаванні, ходзіць на прагулкі. Як, напрыклад, тая ж Марфа Рабкова, з якой я сядзела. Яна ў шыкоўнай форме. Па Эдуарду бачна, што ён не апускае рук. Дбае пра сябе, бо там нікому ты больш не патрэбны», — адзначае былая палітзняволеная.
Эдуард Бабарыка падчас перадвыбарчай кампаніі 2020 года быў кіраўніком ініцыятыўнай групы вылучэнца на прэзідэнцтва Віктара Бабарыкі, які сабраў найбольшую колькасць подпісаў за сваё вылучэнне ў гісторыі Беларусі. І бацьку, і сына арыштавалі на этапе здачы сабраных подпісаў у ЦВК. 18 чэрвеня 2020 года Эдуарда змясцілі ў СІЗА КДБ.
Ён праходзіць абвінавачваным па дзвюх крымінальных справах паралельна.
Першую вядзе КДБ з моманту затрымання паводле артыкула 243 Крымінальнага кодэкса (ухіленне ад выплаты сум падаткаў і збораў, што пацягнула шкоду ў асабліва буйным памеры). Канчатковае абвінавачванне да гэтага часу не выстаўлена, справа ў суд не перададзена.
Другую справу вядзе Цэнтральны апарат Следчага камітэта. Эдуард стаў падазраваным у снежні 2021 года. Абвінавачванне выстаўлена па частцы 3 артыкула 130, частцы 1 артыкула 293 Крымінальнага кодэкса — «Распальванне расавай, нацыянальнай, рэлігійнай альбо іншай сацыяльнай варожасці» і арганізацыя масавых беспарадкаў. Па гэтым артыкуле Эдуарду пагражае да 20 гадоў.
Праваабаронцы лічаць, што яго трымаюць, фактычна, закладнікам, дабіваючыся нечага ад ягонага бацькі ўзамен за вызваленне сына.
Эдуард — выпускнік Беларускага дзяржаўнага эканамічнага ўніверсітэта. Ён кіраваў краўдфандынгавымі платформамі Ulej і MolaMola. Захапляўся конным спортам і дайвінгам.
Па звестках, якія даходзяць з няволі, Эдуард займаецца ёгай, чытае, вучыцца маляваць, просіць перадаваць яму кнігі па шахматах.
30 студзеня яму споўнілася 33 гады.
«Наша Нiва» — бастыён беларушчыны
ПАДТРЫМАЦЬ«Я вельмі не люблю тэрмін справядлівасць». Эдуард Бабарыка даў інтэрв'ю з СІЗА
Два гады таму былі затрыманыя Віктар і Эдуард Бабарыкі. Суд над сынам яшчэ не пачынаўся
Уладзімір Пыльчанка: Эдуард Бабарыка можа правесці чарговыя паўтара года ў СІЗА
Цяпер чытаюць
«Упэўнены, ён і з канём каля аркі пагаварыў». Расійскі журналіст апісаў прыезд Лукашэнкі на парад8
Каментары