Над фільмам пра Барбі працуе Грэта Гервіг, вядомая сваімі працамі ў незалежным кіно
На гэтым тыдні Warner Bros выпусціла другі трэйлер фільма. Сама стужка выйдзе ў ліпені.
Таксама на гэтым тыдні ў прэсе з'явіліся плакаты з персанажамі, якія даюць больш падрабязную інфармацыю пра тое, каго іграюць некаторыя з зорак.
Першы трэйлер пра «Барбі» выйшаў летась у снежні.
«Са спрадвечных часоў, з таго часу, як на Зямлі з'явілася першая маленькая дзяўчынка, існуюць лялькі. Але лялькі заўсёды і назаўжды былі лялькамі ў выглядзе немаўлят, пакуль…» — кажа ў трэйлеры голас апавядальніка.
Потым з'яўляецца гіганцкая Барбі ў паласатым купальніку — і дзяўчаткі пачынаюць знішчаць сваіх устарэлых лялек.
Пасля гэтага дзеянне пераходзіць у цалкам ружовы і маляўнічы сусвет Барбі, дзе паказаны некаторыя зоркі фільма, уключаючы Раяна Гослінга, Ісу Рэй і Сіму Лю.
Галоўную гераіню іграе 31-гадовая аўстралійская акцёрка Марго Робі. Яна з'яўлялася ў фільмах «Воўк з Уол-стрыт» і «Аднойчы ў Галівудзе».
Робі была намінаваная на прэмію «Оскар» за найлепшую жаночую ролю ў 2017 годзе за ролю фігурысткі Тоні Хардынг у фільме «Я, Тоня».
Актрыса прызналася, што ведае аб прадузятым стаўленні аўдыторыі да фільма, які расказвае пра адну з самых вядомых бландзінак у свеце.
«Гэта звязана з вялікай прадузятасцю … і мноствам настальгічных успамінаў, — сказала яна ў леташнім інтэрв'ю брытанскаму Vogue. — Але гэта таксама дае шмат магчымасцяў разбурыць гэту прадузятасць».
Каб разарваць шаблоны адносна чаканняў, у якасці рэжысёра прадзюсары запрасілі намінаваную на «Оскар» пісьменніцу і рэжысёрку Грэту Гервіг.
Гервіг, вядомая сваёй дэбютнай індзі-стужкай «Лэдзі Бэрд», фільмам «Маленькія жанчыны», а таксама ўдзелам у незалежных праектах, аб'ядналася са сваім мужам і таксама намінантам на «Оскар» Ноа Баўмбахам, каб напісаць для «Барбі» сцэнарый. Баўмбах вядомы сцэнарыямі да фільма «Кальмар і кіт», а таксама да стужкі са Скарлет Ёхансан і Адамам Драйверам «Шлюбная гісторыя».
«Людзі звычайна чуюць «Барбі» і думаюць: «О, я ўяўляю, што гэта будзе за фільм», — сказала Марго Робі. — А потым яны чуюць, што яго рэжысуе Грэта Гервіг, і такія: «О, ну, можа, я не ведаю».
Фільм выйдзе 21 ліпеня.
Чытайце яшчэ:
«Джон Уік 4»: харэаграфія бою на фоне Осакі, Берліна і Парыжа
Цяпер чытаюць
Фатограф-агент Мішчук расказаў сваю версію таго, што адбылося11
Каментары