Падбітая ўкраінцамі расійская самаходка стала экспанатам Музея Войска ў Беластоку
Артылерыйская самаходная гаўбіца расійскай арміі была падбітая ва Украіне ў 2022 годзе. Такую тэхніку масава выкарыстоўвалі расіяне, калі «за тры дні» хацелі захапіць Кіеў.
Самаходную гаўбіцу 2S19 MSTA-S распрацавалі ў 1989 годзе ў канструктарскай групе завода «Уралтрансмаш», што ў Екацярынбургу. Упершыню яе паказалі шырокай публіцы ў 1992 годзе. Пазней гармату мадыфікавалі. Яе экіпаж складаюць 5 чалавек, а боекамплект — 50 снарадаў.
Такія самаходкі, у тым ліку мадэрнізаваныя, станавіліся трафеямі ўкраінцаў, а знішчаныя траплялі на старонку мэдыя як доказы няўдалага наступу на сталіцу Украіны, а таксама экспанаваліся на выставах.
Адна з такіх самаходак ужо стаіць на тэрыторыі Вайсковага парка ў Беластоку. Вага гарматы 35 тон.
«Гэта першы з экспанатаў у Вайсковым парку, звязаных з жорсткай агрэсіяй супраць незалежнай Украіны. Неўзабаве мы збіраемся прадставіць вам больш абсталявання, звязанага з гэтай бессэнсоўнай вайной», — паведамляе беластоцкі Музей Войска.
Пакуль на гармату, пакрытую налётам іржы і месцамі скарэжаную стрэлам, можна паглядзець праз агароджу. Доступ непасрэдна да самаходкі будзе адкрыты ў Ноч музеяў 13 мая.
Музей Войска ў Беластоку знаходзіцца на вуліцы Węglowej, 3 побач з Музеем ахвяр Сібіры.
Летась у Варшаве такая гармата была адным з экспанатаў на выставе знішчанай ва Украіне расійскай тэхнікі. На выстаўленай тады самаходнай гаўбіцы была бачная літара «О». Гэта азначала, што яна была задзейнічаная расіянамі ў баях на Сумскім напрамку, а падбілі яе ў горадзе Трасцянец у Сумскай вобласці.
Расійская армія ўварвалася ва Украіну 24 лютага 2022 года. Расія з пачатку вайны страціла больш за 10 тысяч адзінак баявой тэхнікі. Амаль пятую частку страт складаюць танкі — іх у Расіі стала менш на 1928 штук, з якіх 554 захапілі УСУ. БМП расійская армія страціла 2284, з іх 610 дасталіся ўкраінскаму боку, бронетранспарцёраў — 304, з іх 93 захоплена.
«Наша Нiва» — бастыён беларушчыны
ПАДТРЫМАЦЬГлядзіце таксама:
Збіццём «Кінжала» ўкраінцы пацвердзілі на практыцы тое, што было гіпотэзай — ЗША
Два амерыканскія эксперты прапанавалі свой мірны план для Украіны. Некаторыя яго пункты шакуюць
Расіяне атакавалі Кіеў «Шахедамі». Усе варожыя дроны былі збітыя
Цяпер чытаюць
«Беларусь цябе любіць». Рэпартаж з развітання з Мікітам Мелказёравым6
Каментары