«Вяршыня расійскай тэхнічнай думкі». У Польшчы знайшлі боегалоўку расійскай ракеты, якая ўпала ў снежні пад Быдгашчам
Знойдзена боегалоўка ад расійскай ракеты, якая ўпала ў лесе пад польскім Быдгашчам у снежні. Пра гэта паведаміў у пятніцу кіраўнік канцылярыі прэзідэнта Польшчы Павел Шрот.
«Што тычыцца боегалоўкі — яна знойдзеная, яе даследуюць адпаведныя ўстановы. Яна асаблівая, бо зроблена з бетону», — сказаў Павел Шрот.
Кіраўнік канцылярыі прэзідэнта паведаміў, што ён «думае, што яна была ў такой форме, каб гэтая старая мадэль ракеты магла ўвесці ў зман украінскую супрацьпаветраную абарону».
Як ён запэўніў, выбухоўкі ў ёй не было, піша «Еўрапейская праўда».
Шрот адзначыў, што ракета «не можа ляцець без боегалоўкі, таму хтосьці ўмантаваў туды такую вяршыню расійскай тэхнічнай думкі».
На пытанне журналіста аб наступствах, звязаных з ракетнай справай, кіраўнік кабінета прэзідэнта Дуды адказаў, што ў канцылярыі прэзідэнта не было прапаноў аб адстаўцы генерала, генералітэта або міністра нацыянальнай абароны Мар'юша Блашчака.
Павел Шрот адзначыў, што не чакае просьбаў аб адстаўцы. І, як ён адзначыў, прадстаўнікі ўрада проста кажуць, што, улічваючы пазіцыю, сфармуляваную прэзідэнтам, вылучэнне падобных патрабаванняў цяпер з'яўляецца неапраўданым.
«Мы павінны спыніць гэты серыял, які шкодзіць інтарэсам нашай радзімы», — падкрэсліў ён.
Расследаванне справы забралі ў вайсковых пракурораў. У пятніцу было абвешчана, што справа была перададзена нацыянальнай пракуратуры.
27 красавіка Міністэрства нацыянальнай абароны паведаміла, што ў Замосці, прыкладна за 15 км ад Быдгашча, былі знойдзеныя рэшткі неўстаноўленага вайсковага аб'екта. Было падкрэслена, што сітуацыя не пагражае бяспецы жыхароў. Акруговая пракуратура ў Гданьску пачала расследаванне па гэтай справе.
Каментары