«Адразайце ім вушы, пускайце кроў». Піліп Шаўроў адзначыўся яшчэ раз
Пасля ўчорашняй навіны пра тое, што Піліпа Шаўрова чакае суд у Польшчы за пагрозы актывістам, «Нашай Ніве» расказалі яшчэ пра адзін нядаўні інцыдэнт з яго ўдзелам.
Відэа, якое даслалі «Нашай Ніве», здымаў сам Шаўроў і публікаваў у сваіх сацыяльных сетках, але пасля выдаліў. Яно было запісана 30 красавіка ва Уроцлаве (Польшча) каля ўніверсітэта, дзе праходзіла выступленне палітыка Зянона Пазняка.
На відэа бачна, як перад уваходам у будынак стаіць ахова з ліку сяброў Руха беларускіх нацыяналістаў. Шаўроў здымае іх і называе «бандытамі Пазняка». На лекцыю яго не пусцілі, ён паспрабаваў прарвацца. Шаўроў кажа, што будзе змагацца, каб іх пасадзілі ў польскую турму.
«Гэта навалач, якую трэба знішчаць, паліць у газавых камерах. Я асабіста вось тут абяцаю спальваць гэтую нечысць, вынішчаць яе ўсімі магчымымі сродкамі. Я заклікаю ўсіх да персанальнага тэрору», — кажа Шаўроў за кадрам.
«Бачыце гэтых людзей — атакуйце, адразайце ім вушы, адразайце ім горла, пускайце кроў», — заклікае Шаўроў да расправы.
Наколькі вядома, актывісты пасля таго выпадку падавалі заяву ў польскую паліцыю.
Піліп Шаўроў стаў вядомым у студзені 2020 года, калі пафарбаваў у чырвоны колер далоні помніка Пушкіну ў Мінску. Яго затрымалі, ён на камеру нагаварыў паскудстваў аб праціўніках Лукашэнкі, пасля чаго яго адпусцілі. Цяпер хлопец жыве ў Польшчы.
Учора «Еўрарадыё» паведаміла, што Шаўрова затрымлівалі, але адпусцілі да суда, яму інкрымінуецца пагроза забойствам. Затрыманне хлопца было ў Варшаве побач з Моладзевым хабам 21 мая, калі там праходзіў мітынг салідарнасці з палітвязнямі.
Цяпер чытаюць
Просты беларус здзівіў людзей, калі ў Германіі прызнаваўся ў любові да Лукашэнкі. Але аказалася, што ён няпросты7
Каментары