Віцэ-спікер расійскай Дзярждумы публічна пакаяўся за «жахлівы грэх» — сямейныя сувязі з Захадам
Віцэ-спікер Дзярждумы Пётр Талстой адказаў на папрокі ў свой адрас, якія выказваліся ў сувязі з паездкай ягонай дачкі ў ЗША. Ён пакаяўся за гэты страшны грэх дачкі, а пры нагодзе і за аналагічны свой, піша «Коммерсант».
Талстой растлумачыў, што дачка ягоная ў Амерыцы не вучылася, а стажыравалася, але тым не менш яе знаходжанне там назваў «жахлівым сваім грахом» і папрасіў за яго прабачэння. Заадно пакаяўся і ў тым, што ў свой час сам атрымаў другую вышэйшую адукацыю ў Францыі.
«Яна ездзіла на стажыроўку ад школы. Іх павезлі на два тыдні… Гэта страшэнны мой грэх»,— сказаў віцэ-спікер Дзярждумы ў гутарцы ў праграме «Жыццё і лёс» на канале «Расія 1».
«Яна з'ездзіла ў Амерыку, прабачце мне, калі ласка. Я сам атрымаў другую вышэйшую адукацыю ў Францыі. І за гэта прашу прабачэння», — заявіў Талстой. Калі ён пачуў папрокі ў сувязі з вышэйпералічаным, ён, маўляў, адчуў «глабальную віну».
У жніўні 2022 года за сваю дачку ўжо выбачаўся сенатар ад Ханты-Мансійскай аўтаномнай акругі Эдуард Ісакаў. Ён назваў дачку здрадніцай праз яе адмоўную пазіцыю па вайне ва Украіне.
Каментары