АНТ выдаў сюжэт пра атаку на базу АМАП. Прапагандыст дапытваў затрыманага, а сілавікі абстралялі пусты дом
У верасні 2021 года ініцыятыва «Буслы ляцяць» атакавала з дрона базу АМАП. Цяпер, амаль праз два гады, сілавікі затрымалі нібы датычных. Але, як вынікае з сюжэту, арыштаваныя людзі пра атаку і не ведалі.
У сюжэце паказваюць, як прапагандыст АНТ Андрэй Аляксандраў едзе з САХРам на затрыманне. З яго слоў, чалавек, які калісьці дапамог перакінуць дрон для атакі на мінскую базу АМАП, толькі што вярнуўся з-за мяжы.
Сілавікі ў поўным абмундзіраванні спыняюць аўто, выбіваюць бакавую шыбу і жорстка дастаюць мужчыну, цягнуць яго па асфальце.
Дапытваў яго прапагандыст Аляксандраў.
Затрыманы — Сяргей Касцючык. Ён, як вынікае з сюжэту, звычайны кантрабандыст, перакідваў праз мяжу цыгарэты. А пару гадоў таму яго нібыта ўкраінец папрасіў перакінуць у Беларусь дрон, а Касцючык пагадзіўся і падключыў для гэтага яшчэ людзей. Для чаго дрон, той не ведаў.
Цяпер яму інкрымінуюць крымінальны артыкул за саўдзельніцтва ў тэрарызме.
Непасрэдна атакаваў з дрона базу АМАП у Мінску, калі верыць сюжэту, былы вайсковец Віталь Пацехін. Ён раней праходзіў службу ў войсках, звязаных з супрацьпаветранай абаронай. Згодна з АНТ, мужчына звязаўся з ініцыятывай «Буслы ляцяць» і прапанаваў дапамогу. Пацехін нібы мадыфікаваў беспілотнік, на яго можна было ўсталёўваць бутлі з гаручай сумессю.
25 верасня 2021 года дрон атакаваў мінскую базу АМАП. Відэа гэтага тады выкладала ініцыятыва «Буслы ляцяць».
Цяпер у сюжэце сілавікі расказваюць, што скідалі гаручую сумесь двойчы, але база амаль не пацярпела: пашкодзіла машыну і гаражныя вароты.
Самога Пацехіна не затрымалі — ён з'ехаў ва Украіну. За мяжу пазней з'ехала і дачка мужчыны Настасся, якую затрымлівалі за пратэсты.
У сюжэце — відаць, для застрашвання — паказалі, як САХР і прапагандыст штурмуюць пусты дом пад Мінскам (імаверна, дом Пацехіна), абстрэльваюць яго і закідваюць шашкамі.
Аднак на гэтым не скончылі і паехалі затрымліваць сястру Пацехіна і яе мужа. Іх, як кажуць у сюжэце, мужчына нібы папрасіў знішчыць некаторыя «доказы» ў доме. Што гэта, ні сястра, ні муж не ведалі.
Сястру прымусілі званіць Пацехіну на допыце і запісалі гэта на камеру. Імаверна, цяпер яны застаюцца ў няволі і праходзяць фігурантамі крымінальнай справы.
У сюжэце таксама кажуць, што нібы ў «Буслы ляцяць» быў засланнік з ліку сілавікоў. Ён, згодна з сюжэтам, прапанаваў зрабіць атаку на базу ўнутраных войскаў МУС у Валоўшчыне, дзе нічога каштоўнага на той момант не было, і зрэжысаваў яе. Відэа атакі дрона на Валоўшчыну раней публікавалі ў канале ініцыятывы «Буслы ляцяць».
Цяпер чытаюць
Сына экс-кіраўніка Брэсцкай вобласці асудзілі за ўдзел у пратэстах8
Каментары