Зніжкі на навагодніх распродажах у магазінах Мінска могуць скласці да 30%
У мінскіх магазінах пачаўся пашыраны пераднавагодні гандаль са скідкамі. Пра гэта на прэс‑канферэнцыі 1 снежня паведаміў намеснік начальніка галоўнага ўпраўлення спажывецкага рынку Мінгарвыканкама Аляксей Раманаў.
«Гандаль дамаўляецца з прадпрыемствамі прамысловасці аб зніжэнні адпускных цэн і сам зніжае гандлёвыя надбаўкі», — патлумачыў Раманаў. Паводле яго слоў, у гандлёвых прадпрыемствах па гэтай схеме зніжка можа скласці да 30% з улікам зніжэння толькі гандлёвых надбавак на 5—20%.
Раманаў таксама паведаміў, што ў магазінах завяршылася святочнае афармленне вітрын, секцый, аддзелаў, гандлёвых залаў. Пачаты спецыялізаваны продаж навагодніх атрыбутаў, падарачных набораў.
Пройдзе 2 тысячы выстаў‑продаж тавараў і кулінарных вырабаў.
Паводле слоў спецыяліста, з 15 снежня па 10 студзеня гандлёвым прадпрыемствам і прадпрыемствам грамадскага харчавання забаронена закрывацца на рамонт, інвентарызацыю, санітарныя дні. «Устаноўлены аптымальныя рэжымы працы гэтых прадпрыемстваў», — адзначыў Раманаў. 25 і 31 снежня магазіны будуць працаваць па графіку працоўнага дня. З 15 снежня па 1 студзеня рэстараны і кафэ, размешчаныя па‑за жылымі будынкамі, будуць працаваць да 6 раніцы.
Намеснік начальніка галоўнага ўпраўлення спажывецкага рынку Мінгарвыканкама таксама паведаміў аб планах пастаўкі ў гандлёвую сетку горада каля 1 млн. бутэлек шампанскага і пеністых він і каля 1 тыс. тон кандытарскіх вырабаў. У магазінах таксама праходзіць распродаж навагодніх кандытарскіх набораў коштам ад 6 да 75 тыс. рублёў.
Каментары