Гэта трэці такі візіт беларускага епіскапату ў Ватыкан і першы — да папы Бенедыкта XVI. На апошні дзень візіту, 17 снежня, прызначана сустрэча беларускіх іерархаў з пантыфікам.
11 снежня пачаўся візіт аd limina apostolorum (да апостальскіх парогаў, ці да грабніц святых апосталаў) беларускіх біскупаў у Ватыкан,
паведаміў прэс‑сакратар Беларускай рымска‑каталіцкай царквы ксёндз Аляксандр Амяльчэня.
Гэта трэці такі візіт беларускага епіскапату ў Ватыкан і першы — да папы Бенедыкта XVI. На апошні дзень візіту, 17 снежня, прызначана сустрэча беларускіх іерархаў з пантыфікам.
Біскупы наведаюць усе чатыры рымскія базілікі, дзе возьмуць удзел у набажэнствах. Кульмінацыяй візіту стануць дзве сустрэчы з пантыфікам. Спачатку кожны біскуп паасобку сустрэнецца з папам,
а 17 снежня святы айцец звернецца да ўсёй канферэнцыі беларускіх біскупаў з пасланнем, якое рыхтуецца на аснове справаздач і вусных паведамленняў іерархаў. Гэтае пасланне з’яўляецца праграмным, і папа робіць у ім акцэнт на пытаннях, якія патрабуюць вырашэння дзеля далейшага развіцця царквы.
Як адзначыў мітрапаліт Мінска‑Магілёўскі арцыбіскуп Тадэвуш Кандрусевіч, візіт
ad limina — гэта як рахунак сумлення біскупа, а праз біскупа — і ўсёй дыяцэзіі.
«Сярод праблем, якія неабходна ўзняць, — малая колькасць касцёлаў у дыяцэзіях, у маёй у прыватнасці, і асабліва ў Мінску. Падчас апошняга візіту ad limina біскупаў з Беларусі ў Ватыкан у 2003 годзе Ян Павел ІІ адзначаў, што неабходна інтэнсіфікаваць будаўніцтва касцёлаў у Мінска‑Магілёўскай архідыяцэзіі. Вялікай праблемай з’яўляецца недахоп святароў, духоўнае і інтэлектуальнае выхаванне свецкіх, падрыхтоўка рэлігійнай літаратуры на беларускай мове. Я не бачу перспектывы развіцця касцёла ў Беларусі без уключэння ў гэты працэс масмедыя. Патрабуе ўдасканалення і дабрачынная дзейнасць. Важным пытаннем з’яўляецца падпісанне пагаднення паміж Беларуссю і Ватыканам. Несумненна, я буду гаварыць і пра тое, што Беларусь чакае святога айца», — сказаў Кандрусевіч.
Мітрапаліт плануе ўзняць перад папам пытанне стану і перспектыў развіцця дыялогу з праваслаўнай царквой, міжхрысціянскага і міжрэлігійнага дыялогу, праблему выхавання моладзі.
Візіты ad limina apostolorum адбываюцца раз у пяць гадоў. Спачатку біскупы рыхтуюць справаздачы аб жыцці сваёй дыяцэзіі, яе праблемах і перспектывах. Падрыхтаваныя дакументы за паўгода да візіту высылаюцца ў Ватыкан, дзе разглядаюцца і вывучаюцца. Візіт адбываецца ў рамках вызначанай праграмы.
Цяпер чытаюць
Легендарная журналістка Любоў Лунёва расказала пра Віктара Лукашэнку і аднакурснікаў, стварэнне «Вясны» і палітычны бамонд18
Каментары