З аўкцыёну з другой спробы прадалі кватэру дачкі апальнага бізнэсоўца, якому давялося з'ехаць з краіны
На аўкцыёне «Белюрзабеспячэнне» прадало арыштаваную кватэру бізнэсвумен Вікторыі Авяр'янавай.
На аўкцыёне «Белюрзабеспячэнне» прадалі арыштаваную кватэру бізнэсвумен Вікторыі Авяр'янавай. Прадалі кватэру з другой спробы — падчас першага аўкцыёну ахвотных яе купіць не знайшлося. Пачыналіся таргі з пачатковай цаны ў 396 тысяч рублёў. Прадалі яе за 437,58 тысячы рублёў, піша «Люстэрка».
Належыць кватэра Вікторыі Авяр'янавай — прадпрымальніцы і дачцэ вядомага бізнэсоўца Юрыя Авяр'янава. У ёй зарэгістравана непаўналетняе дзіця.
У 2020 годзе Вікторыю Авяр'янаву асудзілі па артыкуле аб ухіленні ад выплаты падаткаў у асабліва буйным памеры. У чэрвені 2020-га суд асудзіў прадпрымальніцу да 3 гадоў пазбаўлення волі ў калоніі агульнага рэжыму.
Ёй адразу ж скарацілі тэрмін на 1 год па амністыі з нагоды 75-годдзя Перамогі ў Вялікай Айчыннай вайне. З улікам часу, праведзенага ў СІЗА, пасля суда ёй заставалася адбыць у калоніі каля года. З яе таксама пастанавілі спагнаць у даход бюджэту шкоду ў памеры 711,7 тысячы рублёў.
Вікторыя Авяр'янава ўзначальвала кампанію «Інтэкс», якая кіравала шэрагам забаўляльных клубаў у Мінску. Па даных суда, кампанія ў 2009-2016 гадах не заплаціла ў бюджэт Беларусі падаткі ў суме звыш 892 тысяч рублёў. Заяўлялася, што кіраўніца «Інтэкса» пры дапамаганні падначаленых ўнесла ў падатковыя дэкларацыі (разлікі) загадзя лжывыя звесткі.
У 2017 годзе Следчы камітэт паведаміў пра затрыманне шасці чалавек, у тым ліку дырэктара ЗАТ «Гандлёвы свет — «Кальцо» і ТАА «Парк забаў Дрымлэнд». Іх падазравалі ва ўхіленні ад выплаты падаткаў. Усе гэтыя бізнэсы кантраляваў Юрый Авяр'янаў.
Пасля прэтэнзій з боку сілавікоў ён пакінуў Беларусь і пераехаў у Нямеччыну. Яго старэйшая дачка Вікторыя — у Расію, дзе выхоўвала двух дзяцей. У канцы 2019 года Вікторыю Авяр'янаву экстрадавалі ў Беларусь.
Цяпер чытаюць
Закінутую сядзібу Багдановічаў пераробяць у буціковы гатэль ФОТЫ7
Каментары