У Карэліі на месцы масавых растрэлаў сталінскіх часоў усталююць помнік ахвярам «фінскай акупацыі»
На тэрыторыі мемарыяльных могілак Сандармох у Карэліі паставяць стэлу з надпісам «Ахвярам рэпрэсій 1937-1939 гадоў і ахвярам фінскай акупацыі часоў Вялікай Айчыннай вайны». Пра гэта са спасылкай на свае крыніцы паведаміла дэпутат заксабрання Рэспублікі Карэлія Эмілія Слабунова, піша «Важные истории».
«Такі надпіс не адпавядае ўсталяванаму дзяржаўнымі дакументамі статуту абʼекта, які падлягае дзяржахове. Гэта супярэчыць гістарычнай праўдзе»,
— заявіла палітык. Яна дадала, што накіравала запыт у пракуратуру з просьбай правесці праверку.
Аб тым, што ўрад Карэліі плануе вылучыць 25,5 млн расійскіх рублёў на «добраўпарадкаванне» мемарыяла, стала вядома ў канцы 2022 года. Пры гэтым, сродкі выдзяляліся не з бюджэту рэспублікі. «Апынулася, што гэта сродкі нейкага гранта, атрыманага кіраўніком Рэспублікі Карэлія за дасягненне нейкіх паказчыкаў», — пісала Слабунова.
Па словах дэпутата, на працягу года чыноўнікі пад рознымі нагодамі адмаўляліся даць ёй доступ да праекту рэканструкцыі.
У адказах на запыты яны сцвярджалі, што гаворка ідзе аб пашырэнні паркоўкі і ўсталяванні лаваў.
Сандармох — адно з самых вялікіх пахаванняў ахвяр масавых сталінскіх рэпрэсій 1937-1938 гадоў. Расстрэльны палігон быў знойдзены ў 1997 годзе гісторыкам Юрыем Дзмітрыевым.
Сваё «расследаванне» падзей у Сандармоху ў 2018-м годзе арганізавалі актывісты ўзначаленага Уладзімірам Медынскім Расійскага ваенна-гістарычнага таварыства. Яны заявілі, што ва ўрочышчы пахаваны вязні фінскіх лагераў.
У апошні час адносіны паміж Фінляндыяй і Расіяй рэзка пагоршыліся. Фінляндыя стала членам НАТА 4 красавіка 2023 года. Краіна падала заяўку на ўступленне ў Паўночнаатлантычны альянс пасля поўнамаштабнага расійскага ўварвання ва Украіну ў лютым 2022 года. Да гэтага Фінляндыя захоўвала нейтральны статус.
Праз гэта расійскі прэзідэнт Уладзімір Пуцін паабяцаў краіне праблемы.
Цяпер праз мігранцкі крызіс Фінляндыя закрыла памежныя пераходы з Расіяй.
«У вас няма будучыні». Расія ідзе па шляху Беларусі — ліквідавалі самую значную праваабарончую арганізацыю
Маскоўскі тэатр адмяніў прэм'еру спектакля «Крэмулятар» паводле Сашы Філіпенкі
Першы расстрэл беларускай інтэлігенцыі. 90 гадоў справе «Беларускага нацыянальнага цэнтра»: як гэта было арганізавана
У Суле адзначылі Купалле. Гасцей было столькі, што на дарогах утварыліся заторы6
Каментары